साखळी माशेल रस्त्यावर आमोणा जंक्शनजवळ एका केमिकलच्या कंटेनरचा भीषण अपघात झाला आहे. या अपघातात चालक आणि क्लिनर गंभीर जखमी झाले आहेत. आज बुधवारी सकाळीच हा अपघात झाला. अपघातामध्ये कंटेनरचं मोठं नुकसान झालं असून यात केमिकलही जमिनीवर सांडल्याने परिसरात भीतीचं वातावरण आहे.

दरम्यान ज्याठिकाणी हा अपघात झाला तिथे तीव्र वळण आहे. याच ठिकाणी बऱ्याचदा वळणाचा अंदाज न आल्याने अपघात झाले आहेत. कंटेनर चालकाचंही या अवघड वळणावर कंटेनरवरचं नियंत्रण सुटलं असल्याचा अंदाज वर्तवला जात आहे. हा अपघात इतका भीषण होता की यात कंटेनरच्या दर्शनी भागाचा चक्काचूर झाला आहे. अपघातानंतर तातडीने 108 रुग्णवाहिकेला बोलावण्यात आलं. जखमी चालक आणि क्लिनरला गंभीर स्थितीत रुग्णालयात दाखल करण्यात आलं आहे.

आमोणे गावातील हा परिसर अपघातप्रवण क्षेत्र मानला जातो. याठिकाणी अनेकदा समोरुन येणारं वाहन न दिसल्यामुळे, तीव्र वळणाचा अंदाज न आल्यामुळे आणि भरधाव वेगामुळे अपघात होतात. या भागात गतीरोधकांचं प्रमाणही कमी असल्यामुळे वेदांता कंपनीकडून अनेकदा वाहनं भरधाव वेगाने खाली येतात आणि नियंत्रण सुटल्यामुळे खाली शेतात कोसळतात. हे अपघात रोखण्यासाठी प्रशासनाने उपाययोजना करण्याची मागणी स्थानिकांमधून होताना दिसत आहेत.