Sumanta Fernandes Death Case: तीन महिन्‍यांपूर्वी नुवे येथे जळून मृत्‍यू आलेल्‍या सुमंता फर्नांडिस हिच्या मृत्‍यूप्रकरणाला वेगळे वळण प्राप्त झाले आहे. सुमंताचा मृत्यू हुंड्यामुळे झाला असल्याचे समोर आले आहे. याप्रकरणी सुमंताची सासू पॅट्रोसीना फर्नांडिस यांच्याविरोधात हुंडाबळीचा गुन्हा दाखल करण्यात आला आहे.

सासरच्या छळाला कंटाळून सुमंताने स्वतःला जाळून घेतल्याने 30 ऑगस्ट रोजी तिचा मृत्यू झाला होता. त्यानंतर आपल्‍या मुलीला तिच्‍या सासरच्‍याच लोकांनी जाळून मारले आहे, असा आरोप सुमंताची आई मारिया फर्नाडिस यांनी केला.

या प्रकरणात संबंधितांवर ४८ तासांच्‍या आत हुंड्यासाठी छळ आणि खुनाच्‍या आरोपाखाली गुन्‍हा नोंद करा, अशी मागणी करणारे एक निवेदन दक्षिण गोवा पोलीस अधीक्षकांना देण्यात आले होते.

दरम्‍यान, मंगळवारी (ता.28) सुमंताच्‍या आईसह प्रतिमा कुतिन्‍हो यांनी मायणा-कुडतरी पाेलिस स्‍थानकाला भेट देऊन निरीक्षक अरुण देसाई यांची भेट घेतली. याप्रकरणी सुमंताचा नवरा नोएल ब्रागांझा आणि त्‍याच्‍या आईवर गुन्‍हा नोंद करा, अशी मागणी त्‍यांनी केली.

जोपर्यंत गुन्‍हा नोंद केला जात नाही तोपर्यंत मृतदेह ताब्‍यात घेणार नाही, अशी भूमिका तिच्‍या आईने घेतल्‍याने मागचे तीन महिने सुमंता हिचा मृतदेह गोमेकॉच्‍या शवागारातच पडून आहे.