म्हापसा: चोर किंवा गुन्हेगार हा नेमका कोणत्या रूपात दडलेला असेल हे सांगता येत नाही. मेस्ताभाट-मेरशी येथील एका मोलकरणीला गोवा पोलिसांनी 5 लाख रुपयांचे सोन्याचे दागिने चोरल्याप्रकरणी अटक केली आहे. काशीबाई लक्ष्मिकांत नायक ही मूळची हंपी कर्नाटक येथील असल्याची माहिती उघड झाली आहे.

फिर्यादी सिडनी मेसीर यांनी नोंदवलेल्या तक्रारीनुसार काशीबाई त्यांच्या घरी कामाला होती. सिडनी मेसीर या अबनेर रेसिडेन्सीमध्ये राहतात आणि मंगळवारी (दि. 12 नोव्हेंबर) रोजी संध्याकाळी 6:30च्या सुमारास ही घटना घडली असल्याची तक्रार त्यांनी पोलीस ठाण्यात दाखल केली.

आरोप करताना त्यांना एकूण 5 लाख रुपयांचे दागिने लंपास करण्यात आल्याची माहिती पोलिसांना दिली. यामध्ये 6 बांगड्या, 1 हार आणि एका अंगठीचा समावेश होता. काशीबाईने फिर्यादयाच्या आईचे कपाट उघडून दागिने पळवले, रात्री एकूणच प्रकार लक्षात आल्यांनतर त्यांनी थेट पोलीस स्थानकात धाव घेतली आणि तक्रार नोंदवली.

फिर्यादीने नोंदवलेल्या तक्रारीनुसार पोलिसांनी संशयित आरोपीला कांदोळी येथून ताब्यात घेत अटक केली आहे. तसेच तिच्याकडून चोरलेले सर्व दागिने जप्त केले आहेत. सध्या एकूण प्रकरणाचा पुढील तपास पोलीस उपनिरीक्षक जस्विता नाईक या करीत आहेत.

पेडणे तालुक्यात चोऱ्यांचे प्रमाण वाढले

पेडणे येथे गेल्या काही दिवसांत चोरीच्या घटना खूप वाढल्या आहेत. सातत्याने चोरीच्या घटना समोर येतायेत. अशीच चोरीची आणखी घटना पेडणे येथून समोर आली आहे. मूळचा महाराष्ट्रातील असणाऱ्या रुपेश कांबळी नावाच्या चोरट्याने चोरीच्या इराद्याने प्रभावती प्रसाद नावाच्या महिलेच्या घरात घुसखोरी केली. यादरम्यान प्रभावती यांनी रुपेशचा सामना केला असता त्याने कोयत्याने त्यांच्यावर हल्ला केला.

या हल्ल्यात प्रभावती जखमी झाल्या. रुपेश प्रभावती यांचे मंगळसूत्र, एक लाखाची रोकड घेवून पसार होण्यात यशस्वी झाला. पण या घटनेची माहिती मिळताच पेडणे पोलिसांनी तात्काळ कारवाई करत कौठळी येथून रुपेशच्या मुसक्या आवळल्या. प्रभावती सध्या बांबोळी येथील रुग्णालयात उपचार घेत आहेत.