मडगाव: दोन दिवसांचे विशेष अधिवेशन उरकून महाराष्ट्राचे मुख्यमंत्री देवेंद्र फडणवीस आज (०९ डिसेंबर) उशीरा रात्री गोव्यात दाखल झाले आहेत. दक्षिणेतील दाबोळी विमानतळावर फडणवीसांचे गोव्याचे राजशिष्टाचार मंत्री मॉविन गुदिन्हो यांनी स्वागत केले.

मुख्यमंत्रीपदाची शपथ घेतल्यानंतर देवेंद्र फडणवीस पहिल्यांदाच गोव्यात दाखल झाले आहेत. यावेळी त्यांच्यासोबत मध्य प्रदेशचे मंत्री कैलास विजयवर्गीय देखील उपस्थित होते. मॉविन यांनी दाबोळी विमानतळावर फडणवीसांची गळाभेट घेऊन पुष्पगुच्छ दिले. महाराष्ट्र विधानसभेत मिळालेल्या मोठ्या यशाबाबत मॉविन यांनी फडणवीसांना शुभेच्छा दिल्या. विमानतळावरुन फडणवीस आणि मंत्री विजयवर्गीय पुढील कार्यक्रमासाठी निघून गेले.

मुख्यमंत्री देवेंद्र फडणवीस यांच्या गोवा भेटीचे कारण अद्याप समोर आलेले नाही. दरम्यान, गोव्यातून कार्यक्रम उरकून उशीरा रात्री फडणवीस माघारी मुंबईला जाणार असल्याची माहिती समोर मिळाली आहे. दोन दिवसांचे विशेष अधिवेशन उरकून फडणवीस अचानक गोव्यात दाखल झाल्याने विविध तर्क लावले जात आहेत. मात्र, त्यांच्या भेटीचे अधिकृत कारण अद्याप समोर आलेले नाही.

दरम्यान, विधानसभा निवडणुकीत महायुतीला बहुमत मिळाल्यानंतर ०५ तारखेला देवेंद्र फडणवीस यांनी राज्याचे मुख्यमंत्री तर एकनाथ शिंदे आणि अजित पवार यांनी उपमुख्यमंत्री पदाची शपथ घेतली. ०८ आणि ०९ डिसेंबर रोजी महाराष्ट्राचे विशेष अधिवेशन पार पडले. यात राहुल नार्वेकर यांची विधानसभेच्या अध्यक्षपदी पुन्हा निवड करण्यात आली. तसेच, या अधिवेशनात नवनिर्वाचित आमदारांचा देखील शपथविधी पार पडला.