Mahadayi Water Dispute: म्हादई प्रकरणावरून कर्नाटकातील नेते मातृभूमीशी एकनिष्ठ आहेत. तर गोव्याचे माजी मुख्यमंत्री मनोहर पर्रीकर आणि डॉ. प्रमोद सावंत यांनी आपल्या मातृभूमीचा विश्‍वासघात केल्याचा आरोप काँग्रेसचे माजी प्रदेशाध्यक्ष गिरीश चोडणकर यांनी केला आहे.

चोडणकर यांनी प्रसिद्धीस दिलेल्या निवेदनात म्हटले, की, कर्नाटकातील नेत्यांनी ज्याप्रकारे आपल्या मातृभूमीशी एकनिष्ठपणा दाखविला आहे, तसा एकनिष्ठपणा गोव्यातील भाजपच्या नेत्यांनी दाखवावा.

मुख्यमंत्री डॉ. प्रमोद सावंत यांनी काँग्रेसवर केलेल्या आरोपाला उत्तर देताना चोडणकर म्हणाले, सावंत यांनी मागील घटना पहाव्यात.

गोव्यात काँग्रेस सरकार असताना त्यांनी कर्नाटक काँग्रेस सरकारबरोबर संघर्ष केला होता. त्याशिवाय मुख्यमंत्री सावंतच म्हादईला आपली ‘आई’ असल्याचा दावा करीत असले, तरी ते राजकीय फायद्यासाठी आईशी तडजोड करणारे आहेत, असाही आरोप त्यांनी केला आहे.

खोटे कोण बोलतो?

काँग्रेसच्या शिष्टमंडळाने जेव्हा कळसा-भांडुरा प्रकल्प ठिकाणांचा दौरा केला, तेव्हा म्हादईचे पाणी वळविल्याचे सावंत यांच्या निदर्शनास आणून दिले होते. तेव्हा सावंत यांनी त्याचा इन्कार केला होता, याची आठवण चोडणकर यांनी करून दिली. त्यामुळे खोटे कोण बोलतो, अशा खोटारड्यांवर विश्‍वास ठेवायचा का?

अशा लोकांच्या हाती आपला गोवा सुरक्षित आहे का? असे सवाल चोडणकरांनी उपस्थित केले आहेत. अशा गंभीर विषयावर खोटारडेपणा करणाऱ्या सावंत यांनी आपल्या पदाचा राजीनामा द्यावा, अशी मागणीही चोडणकरांनी केली आहे.