Mahadayi Water Dispute: म्हादईचे पाणी कर्नाटक वळवू शकत नाही, आम्ही म्हादईचे पाणी कर्नाटकला वळवू देणार नाही. गोमंतकीयांनी सघटित होण्याची गरज आहे. ‘उटा’ संघटना म्हादई बचाव आंदोलनात सक्रिय सहभागी होईल, असे युनायटेड ट्रायबल्स असोसिएशन ‘उटा’ या संघटनेचे अध्यक्ष प्रकाश वेळीप यांनी फोंड्यात घेतलेल्या पत्रकार परिषदेत सांगितले.

यावेळी ‘उटा’ संघटनेचे विश्‍वास गावडे, दुर्गादास गावडे तसेच इतर पदाधिकारी उपस्थित होते. म्हादईचा विषय तापला आहे.

तेच आता ‘उटा’ संघटनेनेही म्हादई बचाव आंदोलनाला पाठिंबा दिल्याने या निर्णयाचे स्वागत करण्यात येत असून प्रत्येक तालुक्यात जागृती सभा घेतली जाणार आहे, असेही यावेळी सांगण्यात आले.

प्रकाश वेळीप म्हणाले की, म्हादईच्या पाण्याचा न्यायालयीन लढा आहे. गोवा सरकारने हा विषय न्यायालयासमोर नेला असतानाही मध्येच कर्नाटक सरकार म्हादईचे पाणी वळवू शकत नाही.

म्हादईचे पाणी पळवल्यास गोव्याच्या निसर्गावर घाला घातल्यासारखे होणार असून गोव्यातील पंधरा लाख लोकसंख्येचा हा प्रश्‍न आहे.

म्हादईचा विषय धसास लावण्यासाठी आता गोमंतकीयांनी संघटीत होऊन बाहेर पडण्याची आवश्‍यकता आहे. ‘उटा’ संघटना त्यासाठी तयार आहे, असेही वेळीप म्हणाले.