Mahadayi Water Dispute: म्हादई’ हे आमचे अस्तित्व आहे. सर्वांची आई तथा जीवनदायिनी म्हादईवर ओढवलेले संकट दूर करण्यासाठी चाळीसही आमदारांनी पुढाकार घ्यावा.

तशी इच्छा नसेल, तर नुसत्या खुर्च्या तापविण्यापेक्षा चाळीसही आमदारांनी राजीनामा देऊन घरी बसावे. असा सज्जड इशारा माजी आमदार प्रताप गावस यांनी दिला आहे. दरम्यान, साखळीतील नियोजित ‘म्हादई बचाव’ सभेला पालिकेने दिलेली परवानगी मागे घेतली आहे.

साखळी येथे आयोजित ‘म्हादई बचाव जनमत कौल’ सभेच्या पार्श्वभूमीवर जागृती करण्यासाठी आज सायंकाळी साखळी येथे घेतलेल्या पत्रकार परिषदेत ते बोलत होते. यावेळी सुनिता वेरेकर आणि मंगलदास नाईक उपस्थित होते.

पाणी ही प्रत्येक प्राणीमात्राची गरज आहे. म्हादई वाचली नाही, तर पूर्ण गोव्याचे अस्तित्व धोक्यात येईल अशी भीती प्रताप गावस यांनी व्यक्त करून जीवनदायिनी म्हादईच्या अस्तित्वासाठी जेथे ही सभा होईल तेथे लोकांनी मोठ्या संख्येने उपस्थित रहावे, असे आवाहन केले.

एकाएकी बदल

साखळीतील नियोजित ‘म्हादई बचाव’ सभेला पालिकेने दिलेली परवानगी मागे घेतली आहे. सोमवारी (ता. 16) साखळी येथील मैदानावर या भव्य सभेचे आयोजन करण्यात आले होते. या सभेला साखळी पालिकेने परवानगीही दिली होती. मात्र, आता ही परवानगी मागे घेण्यात आली आहे.

‘लोकशाहीचा खून’

ज्यांनी म्हादईचा खून केला, त्यांनीच आता लोकशाहीचाही खून केला. त्या रक्ताचे डाग मुख्यमंत्री प्रमोद सावंत यांच्या हातावर दिसत आहेत, अशी प्रतिक्रिया विजय सरदेसाई यांनी साखळी येथील सभेला परवानगी नाकारण्याच्या निर्णयावर व्यक्त केली.