Mahadayi Water Dispute: ‘सेव्ह म्हादई’ या झेंड्याखाली साखळीत जी सभा घेतली जाणार आहे, ती होणारच. आम्ही सभा रद्द केलेली नाही. केवळ नगरपालिकेने परवानगी नाकारली आहे.

आमचा लढा हा म्हादईसाठी आहे. आम्ही राजकारण करण्यासाठी ही लढाई लढत नाही, असा हल्लाबोल सेव्ह म्हादई मंचचे सदस्य हृदयनाथ शिरोडकर यांनी केला.

शिरोडकर म्हणाले की, कर्नाटकविरोधात हा संघर्ष सुरू आहे. खरे तर या विषयात आम्हाला राज्य सरकारनेच पाठिंबा द्यायला हवा होता. दिल्लीवरून अमित शहा यांची भेट घेऊन आल्यानंतर मुख्यमंत्र्यांनी पहिले काम सभा रद्द करण्याचे केले. (Save Mahadayi)

त्याला त्यांनी प्राधान्य दिल्याचे स्पष्ट दिसते. 9जानेवारी रोजी आम्ही साखळी पालिकेकडे परवानगी मागितली. तीन दिवसानंतर आम्हाला परवानगी मिळाली आणि पंधराच मिनिटांत ही परवानगी मागे घेतली, यावरून सरकारचे धोरण काय ते स्पष्ट होते, असे शिरोडकर म्हणाले.

म्हादई वाचविण्यासाठी साखळीत सर्व राजकीय पक्षांसह संघटनांची संयुक्त सभा सोमवारी आयोजिली होती. त्या सभेला साखळी पालिकेने परवानगी दिली आणि लगेच मागेही घेतली. या सरकारने लोकशाहीचा खून केला आहे. हे सरकार आंदोलकांना घाबरले आहे. - ॲड.अमित पालेकर, प्रदेशाध्यक्ष, आप.