मडगाव : गेल्या 25 वर्षांपासून मडगावात पार्किंग, वाहतूक, गाडेवाले, रस्त्याच्या बाजुने बसणारे गाडेवाले, बेकायदेशीर बांधकामे जशी चालू होती तशीच चालू आहेत. तुलनेने मडगावमधील लोकसंख्येत मोठी वाढ झाली आहे. बाजार, शाळा, सरकारी कचेऱ्या, पेट्रोल पंप, बॅंका सर्वकाही जवळ जवळ 500 मीटर अंतराच्या परिसरात आहे. तसेच नावेली, कोलवा, नुवे, असोळणा, कोलवा, घोगळ, बड्डे, आके या भागातुन मडगाव बाजारात येणाऱ्या लोकांची संख्याही वाढली आहे. त्यातच दुचाकी, चारचाकी वाहनांच्या संख्येत भर पडल्याने पार्किंग व्यवस्था कोलमडली आहे.

मडगाव नगरपालिकेच्या मुख्याधिकाऱ्यांनी ग्रेस चर्चखाली, नगरपालिकेच्या सभोवताली दुचाकी आणि चारचाकी वाहने पार्क करण्यासाठीच्या जागा पांढऱ्या रंगाने चिन्हांकित केल्या आहे. तरीही रस्त्याच्या दुतर्फा वाहने पार्क करण्याची लोकांची सवय मोडलेली नाही. मडगावमध्ये अशी अनेक ठिकाणे आहेत, जिथे रस्त्याच्या दुतर्फा वाहने पार्क केली जातात आणि त्यामुळे वाहतूक कोंडी होत असते.

काही ठिकाणी नो पार्किंग झोन फलक असतानाही वाहने पार्क केलेली आढळतात. सिटी बसेसही धीम्या गतीने हाकल्या जात असल्याने वाहतुकीस अडथळा निर्माण होतो. काही ठिकाणी रस्ते अरुंद असल्यामुळेही मडगावात सदैव वाहतुकीची कोंडी झालेली आ्ढळते. पोलिसांकडेही पुरेशी कुमक नसल्याचं उत्तर दिलं जात असल्याने सर्वसामान्य मडगावकर मात्र त्रस्त झाले आहे.