मडगाव : मडगाव परिसरात उघड्यावर टाकण्यात येत असलेला कचरा सध्या प्रशासनासमोर मोठं आव्हान ठरु लागलं आहे. याच कचऱ्याची उचल करण्यासाठी मडगाव नगरपालिकेने व्हॅक्युम तंत्रज्ञानावर कचरा गोळा करणारी मशिन खरेदी करण्याचा विचार सुरु केला आहे . या व्हॅक्युम मशिनची किंमत सुमारे 29 लाख रुपये असून या मशिनद्वारे कचरा गोळा करण्याचे प्रात्यक्षिक सोमवारी मडगावात दाखवण्यात आले.

मडगाव परिसरात अनेक ठिकाणी रस्त्याच्या बाजूला कचरा आणून टाकण्याचे प्रकार अनोळखी इसमाकडून घडत आहेत. याला आळा घालण्यासाठी या व्हॅक्युम मशिनचा वापर करणे सोयीचे ठरणार आहे. प्रात्यक्षिकावेळी मडगावचे आमदार आणि ज्येष्ठ काँग्रेस नेते दिगंबर कामत, मडगाव पालिकेचे नगराध्यक्ष लिंडन परेरा आणि नगरपालिकेचे अधिकारी यावेळी उपस्थित होते.

यावेळी बोलताना आमदार दिगंबर कामत यांनी सांगितले की, या मशीनचा वापर करण्यासाठी एक चालक आणि कुशल कामगार लागणार आहे. या यंत्राद्वारे 10 ते 15 मिनिटात एका ब्लॅक स्पॉट जागेचा कचरा साफ करणे शक्य आहे. या वेळी नगराध्यक्ष परेरा यांनी सांगितले की मडगाव आणि फातोर्डा परिसरातील ब्लॅक स्पॉट कचरा गोळा करण्यासाठी या मशीनचा चांगल्या प्रकारे उपयोग होऊ शकणार आहे. तसेच प्रत्येक ठिकाणी एक याप्रमाणे मडगावात किमान दोन मशिनची आवश्यकता आहे.