मडगाव : शहरातील वाढत्या गुन्हेगारी प्रकरणाच्या पार्श्वभूमीवर परिसर सीसीटीव्हीच्या कक्षेत आणले जाण्याची शक्यता आहे. संपूर्ण मडगाव आणि फातोर्डा परिसर सीसीटीव्ही कॅमेऱ्यांच्या निगराणीखाली आणण्याच्या महत्वाकांशी प्रकल्पावर आज सोमवारी मडगाव पालिकेत बैठक झाली.

नगराध्यक्ष लिंडन परेरा यांच्यासह वाहतूक पोलीस निरीक्षक गौतम साळुंके, पालिका मुख्याधिकारी रोहित कदम आणि सीसीटीव्ही कॅमेरे बसविणाऱ्या कंपनीच्या अधिकाऱ्याने भाग घेतला होता. या बैठकीनंतर पत्रकारांशी बोलताना मुख्याधिकारी कदम यांनी सध्या हा प्रस्ताव प्राथमिक अवस्थेत असून यासाठी खासदार निधी योजनेतून पैसे मिळविण्यासाठी प्रयत्न केला जाणार असल्याचे सांगितले.

दरम्यान मडगाव शहरात जे सीसीटीव्ही कॅमेरे बंद पडलेल्या अवस्थेत आहेत त्यांची तपासणी करून त्यात नेमक्या कोणते दोष आहेत त्यांची तपासणी करून आठ दिवसात अहवाल सादर करण्याचे निर्देश आज कॅमेरा कंपनीच्या प्रतिनिधीला देण्यात आले अशी माहिती कदम यांनी दिली. मडगाव शहरात सध्या 11 मोक्याच्या ठिकाणी 23 सीसीटीव्ही कॅमेरे बसविण्यात आले आहेत. 2020 साली बसविण्यात आलेल्या या कॅमेऱ्यापैकी बरेच कॅमेरे बंद अवस्थेत आहेत.