काणकोण : काणकोणात सोमवारी रात्री झालेल्या वादळी वाऱ्यामुळे वीज खात्याचं सुमारे 6 लाखांचं नुकसान झालं आहे. पाळोळे आणि अन्य भागात वीजेच्या तारांवर माडासह अन्य झाडे उन्मळून पडल्याने आठहून अधिक वीज खांब मोडून पडले आहेत तर अनेक ठिकाणी वीजेच्या तारा तुटल्या आहेत. त्यामुळे खंडित झालेला वीजपुरवठा पूर्ववत करण्याचे काम सुरु केले आहे. संध्याकाळपर्यंत पाळोळेतील वीजपुरवठा सुरळीत होणार असल्याची माहिती वीज खात्याचे सहाय्यक अभियंता अनुप राणे यांनी दिली आहे.

पाळोळेसह आसपासच्या किनाऱ्याला वादळी वाऱ्याचा सोमवारी रात्री जोरदार फटका बसला. सोसाट्याचे वारे वाहत असल्याने किनाऱ्यालगत असलेल्या पर्यटकांच्या कॉटेज आणि बीच रिसॉर्टवरील प्लास्टिक खुर्च्या समुद्रात जाऊन पडल्या. तसेच ओव्हरे पाळोळे येथे एका घरावर माड पडून घराचं मोठं नुकसान झालं आहे. एकट्या पाळोळेमध्ये चार-पाच माडांची पडझड वीज तारांवर झाली त्यामुळे या भागातील वीजप्रवाह रात्रीपासून खंडित झाला आहे.

दुसरीकडे वादळी वाऱ्यामुळे मडगाव-कारवार हमरस्त्यावर करमल घाटात वृक्ष उन्मळून पडल्याने वाहतुकीला अडथळा निर्माण झाला होता.काल रात्रीपासूनच अग्निशमन दलाचे कर्मचारी पडझड झालेले वृक्ष आणि माड हटविण्याच्या कामात व्यस्त आहेत.

दरम्यान वादळी वाऱ्यासह आलेल्या पावसाने राज्यात ठिकठिकाणी मोठं नुकसान झालं आहे. अनेक विजेचा लखलखाट आणि ढगांच्या गडगडाटासह सोमवारी रात्री अनेक ठिकाणी अवकाळी पावसाचा तडाखा बसला. वाऱ्यासह पडलेल्या जोरदार पावसामुळे गोव्याच्या अनेक भागात दाणादाण उडाली. साधारण पाऊण तास जोरदार पर्जन्यवृष्टी झाली. पावसामुळे रस्त्यावर सर्वत्र पाणी झाले होते. वाऱ्यामुळे बहुतेक भागात वीज पुरवठाही खंडित झाल्याने रात्रीभर सर्वत्र काळोखाचे साम्राज्य पसरले होते. सकाळनंतर काही भागात वीजपुरवठा पूर्ववत करण्यात वीज खात्याला यश आलं आहे.