Queue At Curchorem Central Bank After Fruad By Tanvi Vasta Anand Jadhav

केपे: कुडचडे येथील सेंट्रल बँकेचा आनंद जाधव व सेनी कुलासो ऊर्फ तन्वी वस्त या दोघांनी मिळून वीस ते बावीस खातेदारांची सुमारे दीड कोटी रुपयांची फसवणूक केली आहे. त्‍यामुळे हे खातेधारक प्रचंड तणावाखाली आहेत. दिवसाला कित्येकजण आपले खाते तपासण्यासाठी बँकेत येत असल्याने लोकांच्या रांगा लागत आहेत. आतापर्यंत कुडचडे पोलिसांत दोन्‍ही संशयितांविरोधात २४ जणांनी तक्रारी दाखल केल्या आहेत.

ज्या तक्रारी आल्या आहे ते पाहता तन्वी व जाधव यांनी ज्‍येष्ठ नागरिक तसेच मोबाईलचे ज्ञान नसलेल्या लोकांना आपले लक्ष्‍य केल्याचे दिसून येते. पोलिसांनी आतापर्यंत सुमारे १८ लाख रुपयांचे दागिने जप्त केले असले तरी तन्‍वीच्‍या बँक खात्यात फक्त ८५०० रुपये असल्‍याचे स्‍पष्‍ट झाले आहे. त्‍यामुळे लोकांची लुबाडणूक करून मिळविलेले पैसे तिने कुठे ठेवले आहेत, याचा तपास करण्याचे मोठे आव्‍हान पोलिसांसमोर आहे.

काकोडा येथील स्टीव्हन्‍सन फर्नांडिस या ज्‍येष्‍ठाने आपल्याला ८ लाख रुपयांना फसविल्याची तक्रार दाखल केली आहे. फर्नांडिस यांनी आपल्या एका फ्लॅटची विक्री केली होती व सदर पैसे सेंट्रल बँकेत ठेवले होते.

काही दिवसांनी फर्नांडिस बॅंकेत गेले असता तन्‍वी या बँक कर्मचारी असल्याचे समजून त्‍यांना कायम ठेवीविषयी विचारले. तिने दीड लाखाच्या दोन व दोन लाखांची एक मिळून पाच लाखांच्या ‘फडी’चे बनावट सर्टिफिकेट दिले. तसेच आपल्या नकळत आपल्या खात्यातील तीन लाख रुपये काढले असे त्‍यांनी म्‍हटले आहे.