Lolaye Village Goa Eco Sesitive Zone

काणकोण: लोलयेच्या ग्रामसभेत लोलये गाव पश्चिम घाट जैव संवेदनशील क्षेत्रात कायम ठेवण्याचा ठराव एकमताने घेण्यात आला. तसेच गावातील पठारांवर विकासकामे करणे व भूरूपांतरणास आळा घालण्याचा ठरावही मंजूर करण्यात आला. या सभेला शंभरपेक्षा जास्त ग्रामस्थ उपस्थित होते.

या सभेत हल्लीच पर्यावरण, वन व हवामान बदल मंत्रालयाने जारी केलेल्या अधिसूचनेसंदर्भात चर्चा करण्यात आली. यापूर्वी लोलये गाव जैव संवेदनशील यादीत समाविष्ट करावा, अशी मागणी करणारे ३११ ग्रामस्थांच्या सहीचे निवेदन देण्यात आले आहे.

जैव संवेदनशील मसुद्यात जमिनीची मालकी बदलणे, घरांची बांधणी व दुरुस्ती करण्यास प्रचलित कायद्याप्रमाणे मुभा आहे. त्याचप्रमाणे शेती, बागायती, लागवड, वनीकरण व आर्थिक व्यवसाय करण्यास पूर्ण मुभा आहे, असे लोलये नागरिक समितीचे अध्यक्ष दत्तप्रसाद प्रभुगावकर यांनी ग्रामसभेत सांगितले.

जैवसंवेदनशील गावाचा दर्जा मिळाल्यानंतर गावात प्रदूषणकारी मोठ्या औद्योगिक प्रकल्पांना आळा बसेल. त्यांना परवानगी देण्यासाठी ग्रामसभेची मान्यता घ्यावी लागणार असल्याचे प्रशांत पागी यांनी सांगितले.

जैव संवेदनशील गाव म्हणून घोषित केल्यामुळेच ग्रामस्थांचाच फायदा होणार आहे. या ठरावाची अंमलबजावणी व्हावी यासाठी पर्यावरण, वन व हवामान बदल मंत्रालय व मुख्यमंत्री डॉ. प्रमोद सावंत यांना निवेदन सादर करण्यात येणार आहे, असे प्रभुगावकर यांनी सांगितले.