पणजी: पणजीचे आमदार बाबूश मोन्सेरात यांनी शहरातील काही प्रसिद्ध पर्यटनस्थळांना भेट देत तिथल्या स्थानिकांशी संवाद साधला. फॉन्टेनहास आणि आजूबाजूला राहणारे स्थानिक सध्या पर्यटकांमुळे होणाऱ्या वारंवार त्रासामुळे नाराज झाले आहेत. चित्रपट सृष्टीमुळे पर्यटकांच्या मनात या भागाने भुरळ पडली आहे, त्यांना या परिसराची अधिक ओढ आहे.

इथे येऊन पर्यटक विविध ठिकाणी फोटो काढतात आणि स्थानिकांना मात्र यामुळे त्रास सहन करावा लागतोय, रहिवाशांना एकांत अनुभवता येत नाही. स्थानिकांनी शनिवारी (दि. १९ ऑक्टोबर) रोज बाबूश मोन्सेरात यांच्याशी झालेल्या भेटीत या सर्व प्रकरणाचा उलघडा केला.

बाबूश मोन्सेरात यांनी स्थानिकांना लिखित स्वरूपात त्यांना होणारे त्रास मांडायला सांगितले आहेत आणि सोबतच हे त्रास कसे सोडवण्यात यावेत याची देखील उपाय सुचवायला सांगितले आहेत आणि लवकरच हे सर्व प्रश्न सोडवले जातील असे आश्वासन दिलेय.

स्थानिकांनी खूप कष्ट घेऊन ही घरं बनवली आहेत आणि काही पर्यटक मात्र बेधुंद अवस्थेत इथे येऊन हवे तसे वावरात, स्थानिकांना सर्व पर्यटकांबद्दल आक्षेप नाही मात्र दारू पिऊन वातावरण बिघडवणाऱ्या पर्यटकांमुळे स्थानिक लोकांना नक्कीच त्रास सहन करावा लागतोय. पर्यटन विभागाकडून राज्यात येणाऱ्या पर्यटकांसाठी काही नियम तयार केलेले आहेत मात्र याचे पालन कोणीही करत नसल्याचं मोन्सेरात म्हणालेत.

सोबतच बाबूश मोन्सेरात यांनी पोलीस पेट्रोलिंगबद्दल सुद्धा एक प्रश्न उभा केलाय. या भागात पोलीस पेट्रोलिंगची गरज आहे, मात्र तरीही पोलीस पुरेसा स्टाफ नसल्याचं कारण देऊन टाळाटाळ करतायत.राज्यात पुरेसा पोलीसफोर्स असून देखील असा प्रश्न का उभा राहावा? असं मोन्सेरात यांचं म्हणणं आहे.

या ठिकाणी पर्यटकांसाठी इंग्रजीमध्ये नियमफलक बनवले गेलेत मात्र कदाचित इथे येणारे पर्यटक हिंदी भाषिक असतील आणि म्हणून त्यांच्यासाठी हिंदीमधून बोर्ड तयार केले गेले पाहिजेत असेही मोन्सेरात म्हणालेत.