Fontainhas News: 'फोंतेन्हास' येथे नागरिक आक्रमक! पर्यटकांच्या बेशिस्तपणाचा वाचला पाढा

Panjim Fontainhas Tourist Problems

पणजी: पणजी - फोंतेन्हास येथील नागरिकांनी शनिवारी आमदार बाबूश मोन्सेरात यांची भेट घेतली आणि पर्यटकांच्या बेशिस्त वर्तनाचा पाढाच वाचला. पर्यटकांकडून वारंवार होणाऱ्या त्रासामुळे येथील रहिवाशांनी आमदारांकडे नाराजी व्यक्त केली.

स्थानिकांच्या म्हणण्यानुसार, त्यांच्या घरांवर पर्यटक एकप्रकारे आक्रमण करतात आणि त्यांना त्यांचा एकांत अनुभवता येत नाही. त्यामुळे यावर कारवाई केली जावी. मळा-फोन्तेईन्हास या भागाकडे शहराचे वारसास्थळ म्हणून पाहिले जाते.

येथील पोर्तुगीजकालीन वसाहती पर्यटकांनाच नव्हे तर चित्रपटसृष्टीलाही भुरळ घालतात. गोव्याची ही एक ओळख बनलेली आहे, त्यामुळेच पर्यटकांचा या परिसरात ओढा अधिक असतो आणि त्या ठिकाणची छायाचित्रे ते काढतात. छायाचित्रे काढीत असताना अनेक पर्यटक घरांच्या खिडक्यांजवळ, दरवाजाजवळ उभे राहून फोटो काढतात. त्याचा स्थानिकांना विनाकारण त्रास होतो. अनेकदा स्थानिक आणि पर्यटकांमध्ये वादाचे प्रकारही या ठिकाणी घडले आहेत.