Waste Project: बेतोडा निरंकाल कोनशे कोडार पंचायत क्षेत्रातील वैद्यनगर येथे कचरा प्रकल्प उभारण्यात येत असून या प्रकल्पाला स्थानिकांचा विरोध आहे. आज वैद्यनगर भागातील नागरिकांनी पंचायतीवर धडक देत सरपंचाकडे आपला विरोध दर्शवला.

सरपंच मधू खांडेपारकर व ग्रामस्थांची यावेळी चर्चा झाली. पंचायत बैठकीत यासंबंधी विषय मांडणार असल्याचे सरपंचांनी प्रकल्पाला विरोध करणाऱ्या ग्रामस्थांना सांगितले.

बेतोडा पंचायतीजवळ यापूर्वी ओल्या कचऱ्यावर प्रक्रिया करण्यासाठी कचरा प्रकल्प उभारण्याचे निश्‍तिच झाले होते. मात्र, त्यावेळेला स्थानिकांनी पंचायतीजवळ कचरा प्रकल्प उभारल्यास पंचायतीत कामासाठी येणाऱ्या नागरिकांना त्याचा त्रास होणार असल्याचे सांगून आपला विरोध दर्शवला. त्यानंतर हा कचरा प्रकल्प वैद्यनगर भागात हलवण्यात आला.

सद्यस्थितीत या कचरा प्रकल्पाचे ऐंशी टक्के काम पूर्ण झाले आहे. नोव्हेंबर महिन्याच्या शेवटच्या आठवड्यात या कचरा प्रकल्पाला विरोध करणारे निवेदन पंचायतीला देण्यात आले होते, पण कचरा प्रकल्प पूर्णत्वास येण्याच्या मार्गावर असल्याने या निवेदनाकडे पंचायतीने तेवढेसे लक्ष दिले नाही,

पण आता हा प्रकल्प पूर्णत्वास येत असून त्यानंतर या ठिकाणी ओल्या कचऱ्यावर प्रक्रिया होणार असल्याने त्याचा त्रास स्थानिकांना होणार आहे, त्यामुळेच आज स्थानिकांनी या प्रकल्पाला विरोध करण्यासाठी पंचायतीला धडक दिली.

यावेळी सरपंच मधू खांडेपारकर, स्थानिक पंच सदस्य दुर्गाप्रसाद वैद्य तसेच उपसरपंच चित्रा सालेलकर उपस्थित होत्या. निवेदन उशिरा आल्यामुळे कार्यवाही होणे कठीण असल्याने आता हा विषय पंचायत बैठकीत मांडण्याचे पंचायतीने ठरवले असल्याचे सांगण्यात आले.