मडगाव: ‘बीएएलएल’बी प्रवेश परीक्षा प्रक्रियेत घाेळ केल्‍याचा ठपका ठेवून गाेवा विद्यापीठाच्‍या सत्‍यशाेधन समितीच्‍या निर्देशानुसार निलंबित करून चौकशी सुरू करण्‍यात आलेले कारे कायदा महाविद्यालयाचे माजी प्राचार्य डॉ. साबा दा सिल्‍वा यांनी मंगळवारी दणका बसला.
आपल्‍यावरील निलंबन हटवावे यासाठी त्यांनी मुंबई उच्‍च न्‍यायालयात (Mumbai High Court) रिट याचिका दाखल केली होती. मात्र, सध्‍याच्‍या परिस्‍थितीत आम्‍ही हे निलंबन मागे घेऊ पाहत नाही. यासंदर्भात जी चौकशी समिती नेमली आहे त्‍यातून काय निष्‍पन्न होते, हे पाहिल्‍यावर अर्जदार सिल्‍वा हे पुन्‍हा न्‍यायालयाकडे दाद मागू शकतात, असे नमूद करून ही याचिका निकालात काढली.
२०२३च्या बीएएलएलबी अभ्‍यासक्रमाच्‍या प्रवेश परीक्षा प्रक्रियेत घाेळ केल्‍याचा ठपका ठेवून कारे कायदा महाविद्यालय चालविणाऱ्या विद्या विकास मंडळ या संस्‍थेने २६ जुलै २०२३ राेजी डॉ. दा सिल्‍वा यांना निलंबित केले होते. सध्‍या त्‍यांच्‍याविरोधात सत्यशोधन समितीसमोर चौकशी सुरू आहे.
बीएएलएलबी अभ्‍यासक्रमांसाठी प्रवेश परीक्षा घेतेवेळी बारावीच्‍या परीक्षेतील गुणांना आणि प्रवेश परीक्षेच्‍या गुणांना समसमान माप द्यावे अशी पद्धती असताना २०२३ साली झालेल्‍या प्रवेश परीक्षेचेच शंभर टक्‍के गुण गृहित धरून अंतिम प्रवेश यादी डॉ. दा सिल्‍वा यांनी तयार केली होती. आपल्या मुलाला या अभ्‍यासक्रमात प्रवेश मिळावा यासाठी त्यांनी ही प्रवेश प्रक्रिया बदलल्‍याचा आरोप त्‍यांच्‍यावर ठेवण्‍यात आला होता. त्यांचा मुलगा परीक्षा देत असतानाही त्यांनी स्वत:ला प्रवेश प्रक्रियेपासून दूर ठेवले नाही, असा ठपका त्‍यांच्‍यावर ठेवून विद्यापीठाच्‍या सत्यशोधन समितीने १८ जुलै २०२३ रोजी त्‍यांना प्रथमदर्शनी दोषी ठरवून त्‍यांच्‍याविराेधात विद्या विकास मंडळाने अंतर्गत चौकशी सुरू करावी, अशी शिफारस केली हाेती.
न्‍या. एम.एस. कर्णिक आणि न्‍या. निवेदिता मेहता या द्विसदस्‍यीय पीठाने ९ डिसेंबर २०२४ राेजी दिलेल्‍या आदेशात अर्जदार दा सिल्‍वा यांच्‍याविरोधात ज्‍याप्रकारचे आरोप करण्‍यात आले आहेत ते पाहिल्‍यास सध्‍या तरी त्‍यांची ही मागणी पूर्ण करता येणे शक्‍य नाही. मात्र, या प्रकरणातील चाैकशी जलदगतीने पूर्ण करावी आणि अर्जदाराने कारणांशिवाय सुनावणी तहकूब करण्‍यासाठी अर्ज न करता चौकशी समितीला सहकार्य करावे, असे आदेशात म्‍हटले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.