ओरोस: गोवा-मुंबई राष्ट्रीय महामार्गावर तळेरे (ता. कणकवली) येथील ओव्हरब्रिजवर राज्य उत्पादन शुल्क विभागाच्या भरारी पथकाने अवैध दारू वाहतुकीवर मोठी कारवाई केली आहे. तब्बल ८९ लाख २२ हजार ४०० रुपयांच्या दारूसह एक कोटी नऊ लाख ३२ हजार ४०० रुपयांचा मुद्देमाल जप्त केला. राजस्थानमधील वाहनचालकाला अटक केली. ही कारवाई आज पहाटे झाली.

या विभागाने दिलेली माहिती अशी ः भरारी पथकाने गोव्याच्या दिशेने जाणाऱ्या एका मालवाहू वाहनाला संशयावरून थांबवले. कसून तपासणीत बनावट दारू असलेले १०५ बॉक्स आढळले. या दारूसह वीस लाखांचे वाहन, दहा हजारचा मोबाईल असा एकूण सुमारे एक कोटीचा मुद्देमाल जप्त केला.

वाहनचालक मनोहर उदाराम लाल (वय ३२, रा. पानोरिया, ता. चौहटन, जि. बाडमेर, राजस्थान) याला अटक केली. त्याच्याविरुद्ध महाराष्ट्र प्रतिबंधक कायद्यान्वये गुन्हा दाखल केला. विभागातील निरीक्षक अमित पाडळकर व त्यांच्या पथकाने कारवाई केली. पाडळकर तपास करीत आहेत.