लोलये पंचायत क्षेत्रातील माड्डीतळप येथे बिबट्याने हैदोस मांडला आहे.गोठ्यात बांधलेल्या गुरांचा सर्सास या बिबट्याकडून पडशा पाडण्यात येत असल्याचे येथील धनगर वाड्यावरील विठ्ठल मनोहर खरात यांनी सांगितले.दरदिवशी रात्रीच्यावेळी बिबटा गोठ्यात घुसून लहान वासरांना आपले भक्ष्य बनवत आहे.

(Leopard roam at Madditalap in Lolaye Panchayat area)

आता पर्यंत पाच पाडसांची त्याने हत्या केली असून तीन वासरांना जायबंदी केले आहे.त्याचा परिणाम म्हणून नवीन वासरांना जन्म दिलेल्या दुभत्या गाई दूध देत नाहीत. दूध विकून कुटूंबाचा उदरनिर्वाह करण्याशिवाय पर्याय नाही मात्र बिबटा नवीन जन्मला आलेल्या वासरांना एक तर जायबंदी करतो किंवा आपल्या भक्ष्यस्थानी घालतो.

यासबंधी वनखात्याकडे तक्रार करून बिबट्याला पकडण्यासाठी पांजरा लावण्याची मागणी केली असल्याचे खरात यांनी सांगितले. सोमवारी मध्यरात्री बारा वाजण्याच्या सुमारास बिबट्याने गोठ्यात घुसून एका पाडसाला जायबंदी केले, मंगळवारी पुन्हा रात्री दीड वाजण्याच्या सुमारास गोठ्यात येऊन दुसऱ्या पाडसाला जायबंदी केले.

गोठ्यात बिबटा घुसल्यानंतर गुरांनी मोठमोठ्याने हंबरण्यास सुरूवात केल्यानंतर जाग येऊन बिबट्याला उसकावून लावले आतापर्यंत पांच दुभत्या गाईच्या पाडसांना बिबट्याने जायबंदी केल्याने गाई दूध देत नाहीत.मंगळवारी जायबंदी केलेल्या पाडसाच्या अंगावर बिबट्याचे तेरा दांताच्या जखमा असल्याचे खरात यांनी सांगितले.