मडगाव : गोयचे भाट वेळ्ळी येथे विहिरीत बिबट्या पडल्याने एकच खळबळ उडाली होती. विहिरीत पडलेल्या बिबट्याला वन रक्षकांनी सुखरूप बाहेर काढले आणि सर्वांचाच जीव भांड्यात पडला. मात्र बिबट्याच्या वावरामुळे वेळ्ळी परिसरात घबराट पसरल्याचं चित्र आहे.

मडगावच्या वन खात्याला काल बुधवारी रात्री 9 वाजण्याच्या सुमारास बिबट्या विहिरीत पडल्याचा एक फोन आला. वन विभागाचे रेस्क्यू अधिकारी ज्युलिओ कार्दोज आणि बेंहाल आताव यांनी अन्य पथका बरोबर घटनास्थळी धाव घेतली. हा नर बिबटा मध्यम वयाचा होता. आणि पाण्यातून बाहेर येण्यास धडपडत होता.

वन रक्षकांनी विहिरीत दोरीने पिंजरा सोडला आणि मोठ्या प्रयत्नांनी विहिरीत पडलेल्या बिबट्याला त्या पिंजऱ्यात चढवले. यानंतर वन खात्याच्या कर्मचाऱ्यांनी बिबट्याला बाहेर काढले. रात्री 10 वाजता सुरू झालेले हे ऑपरेशन पहाटे 3 वाजेपर्यंत चालू होते. नंतर त्या बिबट्याला जंगलात सोडून दिले. मात्र रात्रभर वेळ्ळी परिसरात बिबट्याच्या सुटकेचा थरार रंगला होता.