Leopard Attacks Dog At Mulgao Bicholim : डिचोली शहराला लागून असलेल्या मुळगावात बिबट्याचा संचार वाढल्‍याने गावात भीतीचे वातावरण पसरले आहे. लोकवस्‍तीपर्यंत पोहोचलेला हा बिबटा एका कुत्र्याचा फडशा पाडून त्‍याला घेऊन पलायन करीत असल्‍याचे दृश्‍‍य सीसीटीव्‍ही कॅमेऱ्यात कैद झाले आहे.

मुळगाव गावालगत खाण आणि जंगल परिसर असल्याने रानटी श्‍‍वापदे असल्याची चर्चा असतानाच, एक बिबट्या श्री तळेश्वर देवस्थान परिसरात भरलोकवस्तीत संचार करीत आहे. त्‍यामुळे जनतेमध्ये घबराट पसरली आहे. या बिबट्याने मुळगावातील काही पाळीव प्राणी फस्त केल्याचा संशय आहे.

मुळगावातील ग्रामस्‍थ गौरेश परब यांचा एक पाळीव कुत्रा गायब झाल्यानंतर सीसीटीव्‍ही फुटेज पाहिली असता वरील संशय खरा ठरला. परब यांच्या घराजवळ मध्यरात्रीच्‍या सुमारास आलेला बिबट्या त्‍या कुत्र्याला घेऊन पलायन करीत असल्याचे दृश्य कॅमेऱ्यात कैद झाले आहे.

मये, सर्वण भागातही संचार

भरलोकवस्तीत बिबट्या मुक्तपणे संचार करीत असल्यामुळे मुळगाववासीयांमध्ये घबराट पसरली आहे. मोठा अनर्थ घडण्यापूर्वीच वन खात्याने या बिबट्याचा बंदोबस्त करावा, अशी लोकांची मागणी आहे. तसे वन खात्याला कळविण्यातही आले आहे, असे सुजल परब यांनी सांगितले.

जंगले मोकळी झाल्याने रानटी प्राणी लोकवस्तीपर्यंत पोचले आहेत. मुळगावप्रमाणेच डिचोली शहराला लागून असलेल्या मये, सर्वण आदी भागातही बिबट्याचा संचार आहे, असे बोलले जाते.