हरमल: वरचावाडा येथील एका घराच्या अंगणात बसलेल्या कुत्र्यावर बिबट्याने हल्ला करून त्याचा फडशा पाडल्याने परिसरात भीतीचे वातावरण पसरले आहे. ही घटना सीसीटीव्ही कॅमेऱ्यात कैद झाली आहे.

१७ रोजी पहाटे सुमारे तीनच्या सुमारास बिबट्या दबक्या पावलांनी घराच्या अंगणात आला. गेटजवळ बसलेल्या कुत्र्यावर त्याने झडप घातली व क्षणातच कुत्र्याला घेऊन तो पसार झाला. गेटचा आवाज होताच घरमालक अंगणात आले असता कुत्रा गायब झाल्याचे त्यांच्या निदर्शनास आले. सीसीटीव्ही फुटेज तपासले असता कुत्र्यावर बिबट्याने हल्ला केल्याचे स्पष्ट झाले.

सुमारे दोन वर्षांपूर्वीही त्याच कुत्र्यावर बिबट्याने झडप घालून त्याला जखमी केले होते. त्यावेळी प्रथमोपचार करून कुत्रा वाचविण्यात आला होता, असे घरमालक नाईक यांनी सांगितले.

गेल्या वर्षी याच भागातील देवानंद नाईक यांच्या मालकीचे रेडकू व कुत्रा यांचा बळी बिबट्याने घेतला होता. त्यावेळी वन खात्याने पिंजरा लावून बिबट्याला जेरबंद करण्याचा प्रयत्न केला होता. मात्र पिंजऱ्यात भक्ष्य नसल्याने बिबट्या अडकला नाही, असे नाईक यांनी सांगितले.