मोरजी: मालपे पेडणे राष्ट्रीय महामार्ग ६६ बायपास रस्त्यावरील दरड आणि संरक्षक भिंतीला धोका नाही, असे लोकप्रतिनिधी, अभियंते म्हणतात. परंतु वाहन चालक, नागरिकांच्या मनात कायमची भीती आहे.

ही भीती दूर करण्यासाठी सार्वजनिक बांधकाम खात्याने संरक्षक भिंत आणि दरड कोसळणार नाही, यादृष्टीनेउपाययोजना करावी, अशी मागणी लेखी स्वरूपात मिशन फॉर लोकलचे राजन कोरगावकर यांनी पेडणे सार्वजनिक बांधकाम खाते रस्ता विभागाला निवेदन देताना केली आहे.

राष्ट्रीय महामार्ग ६६ तयार करत असताना मालपे ते न्हयबाग पर्यंतचा एक बायपास रस्ता केला होता. हा रस्ता करत असताना या रस्त्याच्या बाजूला जी दरड होती ती दरड मागच्या दोन वेळा पावसात कोसळल्याने हा रस्ता पूर्णपणे वाहतुकीस बंद होता.

त्यानंतर कंत्राटदाराने संरक्षण भिंत उभारली. परंतु ही भिंत सुरक्षित आहे की नाही याबद्दल आता लोक संशय व्यक्त करत आहेत, त्याच अनुषंगाने मिशन फॉर लोकलचे राजन कोरगावकर यांनी बांधकाम खात्याला निवेदन देऊन या बांधकाम दुरुस्ती व उपाययोजना करण्याची मागणी केली.

या रस्त्याविषयी स्थानिक आमदार प्रवीण आर्लेकर यांनी २८ मे रोजी या संरक्षण भिंतीची पाहणी केली. त्यावेळी उपजिल्हाधिकारी शिवप्रसाद नाईक उपस्थित होते.