राज्यात गेल्या काही दिवसांपासून जमिनीच्या वादाच्या घटना सातत्याने समोर येतायेत. अशाच प्रकारची घटना चिवार-हणजूण येथून समोर आली आहे. जमिनीच्या वादातून खूनाचा प्रयत्न केल्याप्रकरणी दिगंबर साळकर आणि अखिल टेक्केकर या दोघांना पोलिसांनी अटक केली आहे. जमिनीच्या वादातून मेव्हिल्टन थिओडोर यांच्या खूनाचा प्रयत्न या दोघांनी केला. दरम्यान, थिओडोर यांच्या तक्रारीवरुन खूनाच्या प्रयत्नाचा गुन्हा हणजूण पोलिसांकडून आरोपींविरोधात दाखल करण्यात आला आहे. बाऊन्सरकडून केलेल्या हल्ल्यात मेव्हिल्टन आणि त्यांचे वडील जखमी झाले.

प्रकरण नेमकं काय?

आसागाव येथील मारिया थिओडोर नावाच्या महिलेने दावा केला की, जमिनीच्या वादातून तिचा पती आणि तिच्या मुलावर 20 बाऊन्सर्संनी हल्ला केला. संबंधित जमीन तिच्या आजीची आहे आणि ती कायदेशीर वारस आहे. मात्र असे असूनही तिला जबरदस्तीने बाहेर काढण्यासाठी 20 बाउन्सर तिच्या घरी आले. तिला जबरदस्तीने बाहेर काढत असताना तिचा मुलगा आणि पती जखमी झाले. त्यांना रुग्णालयात दाखल करण्यात आले आहे. दुसरीकडे पोलिसांकडून दावा करण्यात आला आहे की, या घटनेत कोणत्याही बाऊन्सरचा सहभाग नव्हता. याप्रकरणी कायदेशीर कारवाई सुरु आहे.

जमिनीच्या वादातून एकाचा मृत्यू

दरम्यान, काही दिवसांपूर्वी भाटपाल-काणकोण येथून जमिनीच्या वादातून एकाचा मृत्यू झाल्याची घटना समोर आली होती. मृतकाचे नाव संतोष रिवणकर असे होते. संतोष रिवणकर आणि रोहन नाईक यांच्यात झालेल्या बाचाबाचीत गंभीर मार लागल्‍याने तो खाली कोसळला आणि त्याचा जागीच मृत्यू झाला. मात्र मृत्यूचे निश्‍चित कारण वैद्यकीय तपासणीनंतरच स्पष्ट होणार असल्याचे काणकोणचे पोलिस निरीक्षक हरीश राऊत देसाई यांनी सांगितले आहे. पोलिसांनी रोहन नाईक याला अटक केली आहे.

जमिनीचा वाद

संतोष रिवणकर आणि सागर मोरजकर यांच्यात जमिनीवरुन वाद सुरु होता. या दोघांची पोट्टे येथे वीस कलमी कार्यक्रमाअंतर्गत दिलेल्या जमिनीत घरे आहेत. मात्र सागर मोरजकर याला तीन क्रमांकाचा जमिनीचा प्लॉट दिला असताना त्याने प्लॉट क्रमांक पाचवर पक्के बांधकाम करण्यास सुरूवात केल्यानंतर त्याच्याविरोधात संतोष रिवणकर व भाऊ सचिन रिवणकर यांनी दक्षिण गोवा जिल्हाधिकाऱ्यांकडे तक्रार दाखल केली. त्यानंतर जिल्हाधिकाऱ्यांनी बांधकाम रोखण्‍याचा आदेश दिला. तरीसुद्धा त्याने काम सुरुच ठेवले, अशी माहिती स्थानिक पंच सतीश पैंगीणकर यांनी दिली.