डिचोली: लाखेरे-डिचोली येथील एका धनगर कुटुंबाच्या गुरांच्या गोठ्यावर कारवाईची टांगती तलवार असून, हा गोठा मोडण्यासाठी पालिकेने हालचाली सुरू केल्या आहेत.

एकतर हा गोठा हटवा, नाहीतर तो मोडण्यात येईल, अशी आदेशवजा नोटीस डिचोली पालिकेने संबंधित गोठ्याच्या मालकाला दिली आहे. गोठा काढण्यासाठी येत्या बुधवारपर्यंतची मुदत देण्यात आली आहे. बोर्डे कोमुनिदादने केलेल्या तक्रारीला अनुसरून पालिकेने संबंधित गोठ्याच्या मालकाला गेल्या २५ डिसेंबर २०२५ रोजी आदेशवजा नोटीस बजावली होती.

लाखेरे येथील श्री साईबाबा मंदिराच्या मागच्या बाजूने सर्व्हे नं. १०९/० या जमिनीत असलेला गुरांचा गोठा कोमुनिदाद जागेत असून, तो बेकायदेशीर आहे, असा दावा करून बोर्डे कोमुनिदादने गेल्यावर्षी जानेवारी महिन्यात डिचोली पालिकेकडे तक्रार केली होती. त्या तक्रारीला अनुसरून पालिकेने गोठ्याचे मालक कृष्णा ताटे यांना नोटीस बजावली आहे. यामुळे ताटे कुटुंब अस्वस्थ बनले अाहे.

ताटे कुटुंबावर संकट

कारवाईची टांगती तलवार असलेला लाखेरे येथील गुरांचा गोठा धनगर समाजातील कृष्णा ताटे यांचा आहे. शंभर वर्षांपूर्वीपासून हा गोठा असून, या गोठ्यात गाई, म्हशी मिळून पन्नासच्या आसपास गुरे आहेत. मात्र, आता हा गोठा मोडावा लागणार असल्याने ताटे कुटुंबावर मोठे संकट कोसळले आहे.