फोंडा: गोव्यात शिक्षणासाठी आलेल्या लडाखमधील २१ वर्षीय विद्यार्थ्याचा धारबांदोडा तालुक्यातील ओकांब येथे नदीत बुडून दुर्दैवी मृत्यू झाला. डोंगराळ आणि थंड हवामानाच्या प्रदेशातून आलेल्या या विद्यार्थ्याला गोव्यातील खोल पाण्याचा अंदाज न आल्याने ही दुर्घटना घडल्याची चर्चा परिसरात होती. सोमवारी दुपारी अग्निशमन दलाच्या जवानांनी खोल पाण्यातून त्याचा मृतदेह बाहेर काढला.

इम्तियाज हुसेन (वय २१, मूळ रा. लडाख) असे मृत विद्यार्थ्याचे नाव असून तो फर्मागुढी येथील आयआयटीमध्ये प्रथम वर्षात शिक्षण घेत होता. रविवारी सुट्टी असल्याने इम्तियाज आपल्या मित्रांसमवेत फिरण्यासाठी बाहेर पडला होता. सुरुवातीला हा गट एका बंधाऱ्यावर आंघोळीसाठी गेला होता. मात्र, स्थानिक युवकांनी त्यांना तेथून हटविल्यानंतर ते ओकांब येथील नदीकाठी गेले.

तेथे नदीत उतरल्यावर इम्तियाजला खोल पाण्याचा अंदाज आला नाही आणि तो गटांगळ्या खाऊ लागला. त्याच्या मित्रांनी त्याला वाचविण्याचा प्रयत्न केला. मात्र, प्रयत्न अपयशी ठरला. घटनेची माहिती मिळताच अग्निशमन दल व फोंडा पोलिसांनी शोधमोहीम सुरू केली होती. सोमवारी दुपारी त्याचा मृतदेह सापडला.फोंडा पोलिसांनी पंचनामा करून मृतदेह शवचिकित्सेसाठी मडगाव येथील रुग्णालयात पाठविला आहे.

भावाने फोडला हंबरडा

इम्तियाजचा भाऊ व अन्य नातेवाईक फोंडा पोलिस स्थानकात आज सकाळी दाखल झाले. त्यानंतर ते घटनास्थळी पोहोचले. मृतदेह बाहेर काढल्यानंतर भावाने एकच हंबरडा फोडल्याने उपस्थितांचे डोळे पाणावले.

गेल्यावर्षीही झाली होती दुर्घटना

स्थानिक ग्रामस्थांनी सांगितले की, उन्हाळ्यात या परिसरात मोठ्या प्रमाणावर पर्यटक व युवक आंघोळीसाठी येतात. मात्र, नदीतील खोल पाण्याची कल्पना नसल्याने वारंवार दुर्घटना घडत आहेत. गेल्या वर्षीही याच ठिकाणी काणकोण येथील एका युवकाचा बुडून मृत्यू झाला होता. शनिवार, रविवार व सुट्टीच्या दिवशी येथे पोलिस बंदोबस्त ठेवण्याची मागणी ग्रामस्थांनी केली आहे.