Traffic Police at porvorim flyover

पणजी: उड्डाणपुलाच्या कामामुळे पर्वरीत होत असलेली वाहतुकीची प्रचंड कोंडी नियंत्रित करण्यासाठी तेथे वाहतूक पोलिस नियुक्त करण्‍यात आले आहेत. मात्र, रखरखत्‍या उन्‍हात उभे राहून त्‍यांना आपले कर्तव्य बजावावे लागत आहे. शिवाय मूलभूत सुविधा उपलब्ध नसल्यामुळे त्यांच्या आरोग्याला धोका निर्माण होऊ शकतो.

पर्वरी महामार्गावर वाहतूक कोंडी ही आता नित्‍याचीच झाली आहे. सध्या सुरू असलेल्या उड्डाणपुलाच्या कामामुळे ही समस्या अधिकच गंभीर बनली आहे.

त्‍यावर नियंत्रण मिळविण्‍यासाठी वाहतूक पोलिस तासन्‌ तास उन्हात उभे राहून काम करतात. मात्र, त्यांना उभे राहण्यासाठी योग्य जागा आणि निवारा उपलब्ध नाही. त्‍यामुळे त्‍यांची प्रचंड गैरसोय होत आहे.

...तर चांगले काम करू शकू!

याबाबत तेथील एका वाहतूक पोलिसाने सांगितले की, आम्ही आमचे कर्तव्य निष्ठेने बजावतो. सरकारने आमच्यासाठी मूलभूत सुविधा उपलब्ध करून द्याव्यात. भर दुपारच्‍या वेळी कडकडीत उन्हात उभे राहून काम करणे खूप कठीण आहे. योग्य सुविधा मिळाल्या तर आम्ही अधिक चांगल्या प्रकारे काम करू शकू.