मडकई: कुंडई औद्योगिक वसाहतीतील रस्त्यांची पार दैनावस्था झाली असून या रस्त्यावरून वाहतूक करणे डोकेदुखी ठरल्याच्या प्रतिक्रिया वाहनचालकांकडून व्यक्त होत आहेत. रस्त्यावर मोठमोठे खड्डे पडल्याने वाहने चालवायची कशी? असा सवाल वाहनचालक आणि नेहमी या वसाहतीत कामाला जाणाऱ्या कामगारांकडून केला जात आहे.

या रस्त्यावरील खड्डे त्वरित बुझवावे. पावसाने विश्रांती घेतल्‍यामुळे त्वरित रस्ता दुरुस्ती करावी, अशी मागणी वाहनचालकांतर्फे करण्यात येत आहे. एप्रिल-मे महिन्यात रस्ता दुरूस्तीकडे दुर्लक्ष केल्यामुळेच रस्‍त्याची अवस्था बिकट झाली आहे.

कुंडई औद्योगिक वसाहतीत वाहनांची कायम वर्दळ सुरू असते. अवजड ट्रकांची वाहतूक या रस्त्यावरून होत असल्याने रस्त्यावर ताण पडतो. कामगारांची ने आण करण्यासाठी बसगाड्या तसेच जीपगाड्यांची संख्याही मोठी असल्याने खराब रस्त्याचा फटका कामगारांना बसतो.

या मार्गावरून वाहने नेल्यावर पंक्चर होण्याबरोबर नादुरुस्त होण्याचे प्रकार घडत असल्याने वाहनचालक वैतागले आहेत. औद्योगिक वसाहत महामंडळाने या रस्त्यांची त्वरित दुरुस्तीकाम हाती घेऊन वाहनचालक तसेच कामगारांना दिलासा द्यावा, अशी जोरदार मागणी करण्यात येत आहे.