Fake Konkan Railway Jobs : काही घटक कोकण रेल्वेमध्ये नोकरी देण्याचे खोटे आश्वासन देत पैशांची मागणी करून नोकरीसाठी इच्छूक असलेल्याची दिशाभूल करत असल्याची बाब कोकण रेल्वेच्या निदर्शनास आली आहे. या पार्श्वभूमीवर कोकण रेल्वे प्रशासनाने प्रसिद्धीपत्रकाद्वारे जनतेला सतर्कतेचे आवाहन केले आहे.

कोकण रेल्वेने (Konkan Railway) स्पष्ट केले आहे की, संस्थेने कोणत्याही व्यक्ती, एजंट किंवा खासगी एजन्सीला त्यांच्या वतीने पैसे गोळा करण्याचा, रोजगार देण्याचा किंवा नोकरीसंदर्भात कोणतेही आश्वासन देण्याचा अधिकार दिलेला नाही. कोकण रेल्वेमधील सर्व भरती प्रक्रिया केवळ अधिकृत माध्यमांद्वारे आणि शासनाने निश्चित केलेल्या नियम व प्रक्रियेनुसारच पार पाडली जाते.

नोकरीची हमी देण्याचा दावा करणाऱ्या कोणत्याही व्यक्ती, एजंट किंवा मध्यस्थांवर विश्वास ठेवू नये तसेच त्यांच्याशी आर्थिक व्यवहार करू नयेत, असा सक्त इशारा देण्यात आला आहे. अशा प्रकारच्या दाव्यांचा कोकण रेल्वेशी कोणताही संबंध नसल्याचे स्पष्ट करण्यात आले आहे. नोकरी इच्छुकांनी कोकण रेल्वेच्या अधिकृत संकेतस्थळावर (https://konkanrailway.com/) तसेच इतर अधिकृत सरकारी प्लॅटफॉर्मवर प्रसिद्ध होणाऱ्या भरती जाहिराती व अद्ययावत माहितीलाच ग्राह्य धरावे, असा सल्ला देण्यात आला आहे. अशा प्रकारच्या फसव्या कारवायांची माहिती संबंधित अधिकाऱ्यांना त्वरित कळवावी, जेणेकरून इतर नागरिक अशा घोटाळ्यांना बळी पडणार नाहीत, असेही कोकण रेल्वेने आवाहन केले आहे.