Margao Railway Station: कोकण रेल्वेतर्फे मडगाव रेल्वे स्थानकावर प्रवाशांसाठी बॅटरी ऑपरेटेड कार सुविधा सुरू करण्यात आली आहे. कोकण रेल्वे कॉर्पोरेशन लिमिटेडचे ऑपरेशन्स अँड कमर्शियल संचालक संतोष कुमार झा यांच्या हस्ते या सेवेचा प्रारंभ मंगळवारी करण्यात आला.

प्रवाशांना प्लॅटफॉमवरून आपल्या बोगीपर्यंत आरामात जाता यावे, या उद्देशाने प्लॅटफॉर्म क्रमांक एक वर ही सेवा सुरू करण्यात आली आहे.

प्रवाशांना या सुविधेचा लाभ घेता येईल. त्यासाठी 9561612135 या मोबाईल क्रमांकावर संपर्क साधावा लागेल. या सेवेसाठी प्रतीव्यक्ती ५० रूपये शुल्क आहे. डिजिटल पेमेंट करण्याचीही सोय येथे उपलब्ध आहे.

ज्येष्ठ नागरिक, दिव्यांग व्यक्ती, गर्भवती, आजारी व्यक्ती यांना या सेवेत प्राधान्य दिले जाईल. तथापि, या सेवेसाठी अॅडव्हान्स बुकिंग केल्यास प्राधान्य दिले जाईल. अॅडव्हान्स बुकिंग नसेल तर पहिला येणाऱ्या प्राधान्य या तत्वावर ही सेवा दिली जाईल.

सध्याच्या श्रावण आणि सारथी या सेवांना पुरक अशी ही बॅटरी ऑपरेटेड कार सेवा आहे. यामुळे मडगाव स्थानकातील प्रवाशांना आणखी चांगली सेवा मिळणार आहे.