Konkan Railway: पनवेल-कळंबोली मार्गावर मालगाडीचे पाच डबे घसरल्याने कोकण रेल्वे मार्गावरील 23 गाड्या रद्द करण्यात आल्या आहेत. 10 गाड्या अंशत: रद्द तर, 3 गाड्यांच्या मार्ग बदलण्यात आले आहेत. तसेच, चार गाड्यांच्या वेळांत बदल करण्यात आला आहे.

रेल्वे गाड्या रद्द आणि गाडीच्या वेळेत बदल करण्यात आल्याने मडगाव रेल्वे स्थानकावर प्रवाशांची मोठी गर्दी पाहायला मिळाली. रात्रभर प्रवाशी स्थानकावर खोळंबले होते.

पनवेल-कळंबोली मार्गावर मालगाडीचे पाच डबे घसरल्यामुळे 30 सप्टेंबर आणि 1 ऑक्टोबरच्या एकूण 12 गाड्या रद्द करण्यात आल्या. यात पनवेल कुडाळ, कुडाळ पुणे, मडगाव ते लो. टीळक टर्मिनस, मंगळुरु लो. टीळक टर्मिनस या गाड्या पूर्णपणे रद्द करण्यात आल्या. तर, काही गाड्या अंशत: रद्द करण्यात आल्या.

याचा फटका प्रवाशांना बसला व मडगाव स्थानकावर प्रवाशांची एकच गर्दी पाहायला मिळाली. गाड्या रद्द आणि काही गाड्यांच्या वेळेत बदल केल्याने प्रवासी रेल्वे स्थानकावर खोळंबून पडले होते. स्थानकावर मिळेल त्या जागी काहीजण थांबून पर्यायी रेल्वेची वाट पाहत होते.

दरम्यान, रविवारी सायंकाळी 7.30 नंतर मार्गावरील दोन्ही लाईन सुरु करण्यात रेल्वे प्रशासनाला यश आले. वाहतूक हळुहळू सुरळीत होत आहे.

मडगाव स्थानकावर खोळंबलेल्या प्रवाशांनी पर्यायी बस तसेच इतर वाहतूक मार्गाची सोय केली. तर, अनेकांना रेल्वे शिवाय पर्याय नसल्याने रेल्वे वाहतूक सुरळीत होण्याची वाट पाहत स्थानकावर ताटकळत थांबावे लागले. सकाळी काही प्रमाणात गर्दी कमी झाल्याचे दिसून आले.