पणजी: कोकणी भाषा मंडळ आणि अखिल भारतीय कोकणी परिषद यांनी सत्ताधारी आणि विरोधी पक्षाच्या आमदारांना शिक्षणात रोमी कोकणी भाषेचा वापर करण्याची मागणी करणाऱ्या कोणत्याही विधेयकाला/ठरावाला पाठिंबा देऊ नये, असे आवाहन केले आहे.

जारी केलेल्या एका पत्रकात मंडळाची अध्यक्ष रत्नमाला दिवकर आणि परिषदेचे कार्यकारी अध्यक्ष चेतन आचार्य यांनी या मुद्द्याचे नेतृत्व करणाऱ्या आमदारांना आवाहन केले आहे, की त्यांनी घड्याळाचे काटे उलटे फिरविण्याच्या प्रयत्नापासून दूर रहावे.

गोव्यामध्ये १९७० च्या दशकात शिक्षणात देवनागरी लिपीतील कोकणी भाषा सुरू झाली होती. त्यामुळे मुलांच्या भवितव्याशी सांप्रदायिक आधारावर विभाजन करून खेळू नका, असेही आवाहन त्यांनी पुढे केले आहे.

देवनागरी लिपीत कोकणी शिकणारे विद्यार्थी एका वर्गात आणि रोमन लिपीत कोकणी शिकणारे विद्यार्थी दुसऱ्या वर्गात असे विद्यार्थ्यांचे विभाजन झाले तर सर्वधर्म समभावाच्या घटनेतील तरतुदींनाच तिलांजली दिल्यासारखे होईल. म्हणून भारतीय राज्यघटना मानणाऱ्या प्रत्येकाने या विधेयकाचा कडाडून विरोध करावा, असे आवाहन पत्रकात पुढे केले आहे.

दरम्यान, दोन्ही संघटनांनी सरकारी पातळीवर जनमत कौल दिवस (अस्मिताय दिस) साजरा करण्याच्या निर्णयाबद्दल सरकारचे अभिनंदन केले आहे.

...अन्यथा राज्यव्यापी आंदोलन

रोमी कोकणी भाषेसाठी लॉबिंग करणाऱ्या काही आमदारांच्या हालचालींवर तीव्र प्रतिक्रिया व्यक्त करत या दोन्ही संघटनांनी सरकारने असा कोणताही प्रयत्न केल्यास राज्यव्यापी आंदोलन छेडण्याचा इशारा दिला आहे.