Goa Congress गोवा ही परशुरामाची भूमी समजली जाते. पणजीत मांडवी किनारी कोट्यवधी रुपये खर्च करून सुशोभीकरण करण्यात आलेल्या ठिकाणी परशुरामाचा पुतळा उभारण्यात आला आहे. या परशुरामाच्या पुतळ्यासमोर मांडवीतील कॅसिनो आहेत.

येथील जनता परशुरामाला मानते, त्यामुळे एकतर जनभावना ओळखून भाजप सरकारने येथील कॅसिनो हटवावेत आणि ते शक्य नसल्यास हा पुतळा तरी तेथून हटवावा, अशी मागणी काँग्रेसचे नेते संजय बर्डे यांनी शनिवारी पत्रकार परिषदेत केली.

बर्डे म्हणाले, गुजरातमध्ये भाजप सरकारने तीन हजार कोटी रुपये खर्च करून सरदार वल्लभभाई पटेल यांचा पुतळा उभारला आहे. राज्य सरकारने अशा प्रकारचाच पुतळा येथे उभारणे आवश्‍यक होते.

नको त्यावर कोट्यवधी रुपये खर्च केले जातात. गोव्यातील जनतेकडे तरी पुतळ्यासाठी पैसे मागायला हवे होते, त्यांनी त्यासाठी मदत केली असती.

ज्या ठिकाणी पुतळा उभारला गेला आहे, त्या ठिकाणी एका बाजूला हिरवाईने एकेकाळी नटलेला डोंगर आता दिसत नाही, तर त्या ठिकाणी इमारती बांधल्या जात आहेत. तर पुतळ्यासमोर असणाऱ्या मांडवी नदीत कॅसिनो उभे आहेत, हे न पटणारे आहे.

सरकारने जी मूर्ती उभी केली आहे, त्या मूर्तीला तडे गेलेले आहेत. सरकारने लोकभावनेशी खेळू नये. एकतर तत्काळ परशुरामाची मूर्ती तेथून हटवावी, नाहीतर कॅसिनो हटवावेत, ही मागणी आम्ही मुख्यमंत्री डॉ. प्रमोद सावंत यांच्याकडे करीत आहोत.

- संजय बर्डे, कॉंग्रेसचे नेते