मये: महाराष्ट्रातील प्रसिद्ध किर्तनकार शिवलीला पाटील यांचे नुकतेच गोव्यात किर्तन पार पडले. रायझिंग युथ, मये यांच्या वतीने या किर्तनाचे आयोजन करण्यात आले होते. मुख्यमंत्री डॉ. प्रमोद सावंत यांनी शिवलीला यांचे स्वागत केले.

शिवलीला पाटील यांनी गोव्यातील किर्तनाचा एक व्हिडिओ सोशल मिडियावरुन शेअर केला आहे. शिवलीला त्यांच्या सहकाऱ्यांसह मयेतील किर्तनस्थळी हजेरी लावतात, यावेळी मुख्यमंत्री सावंत त्यांचे स्वागत करतात. शिवलीला महाराष्ट्रात सर्वत्र किर्तनासाठी हजेरी लावत असतात.

शिवलीला यांनी किर्तनानंतर गोव्यातील निसर्गाचा आस्वाद घेतला. शिवलीला यांनी गोव्यातील एका समुद्रकिनाऱ्यावरुन फोटो शेअर केले आहेत. यावेळी त्यांच्यासोबत त्यांचे सहकारी देखील उपस्थित होते.

शिवलीला पाटील या मूळच्या सोलापूर जिल्ह्यातील बार्शी तालुक्यातील रहीवासी आहेत. त्या बिग बॉसच्या तिसऱ्या सीजनमध्ये दिसल्या होत्या. यामुळे त्याच्यांवर टीका देखील झाली होती. वारकरी संप्रदाय नाराज झाल्यामुळे त्यांनी अशा प्रकारच्या शो मध्ये जाण्यापूर्वी किंवा असा कोणताही निर्णय घेण्यापूर्वी मोठ्यांशी चर्चा करणार असल्याचे म्हटले होते.