वास्को: सरकारतर्फे (Goa Government) महिलांसाठी राबविण्‍यात येणाऱ्या सामाजिक योजनांचे पैसे त्‍यांना वेळेवर मिळत नाहीत. याबाबत दिरंगाई करून सरकार एकाप्रकारे महिलांचा छळ करीत आहे, असा सनसनाटी आरोप आम आदमी पक्षाचे गोवा संयोजक राहुल म्हांबरे (Rahul Mhambre) यांनी केला. दिल्लीचे मुख्यमंत्री अरविंद केजरीवाल (Arvind Kejariwal) महिलांना त्यांचा हक्क मिळवून देण्‍याबरोबरच त्यांना स्वावलंबी होण्यासाठीही सहकार्य करणार आहे. नावेलीतआज होणाऱ्या महिला मेळाव्‍यात ते महिलांसाठी चांगल्‍या योजनांची घोषणा करतील, असेही त्‍यांनी स्‍पष्‍ट केले.

केजरीवाल यांचे शनिवारी दाबोळी विमानतळावर स्‍वागत केल्‍यानंतर म्‍हांबरे बोलत होते. यावेळी उपाध्यक्ष प्रेमानंद नानोस्कर, परशुराम सोनुर्लेकर व इतर पदाधिकारी, कार्यकर्ते मोठ्या संख्येने उपस्थित होते. केजरीवाल दोन दिवसांच्या गोवा भेटीवर आले असून आज ते नावेली येथे महिला मेळाव्याला संबोधित करणार आहेत. म्हांबरे म्हणाले की, राज्य सरकारतर्फे महिलांसाठी राबविण्‍यात आलेल्‍या योजना हा फक्त देखावा आहे. म्‍हणूनच ‘आप’ने गोव्यातील महिलांसाठी अनेक योजना राबविण्याचा संकल्‍प केला आहे. त्याची विस्‍तृत माहिती केजरीवाल आज देतील.