Mahadayi Water Dispute: म्हादई प्रश्नी गोव्याच्या शिष्टमंडळाने केंद्रीय गृहमंत्री अमित शाह यांची भेट घेतल्यानंतर आता कर्नाटकातूनही म्हादई प्रश्नाबाबत पडसाद उमटू लागले आहेत. पंतप्रधान नरेंद्र मोदी आज, गुरूवारी कर्नाटक दौऱ्यावर आहेत. त्या पार्श्वभुमीवर कर्नाटकमधील काँग्रेसन नेते डी. के. शिवकुमार यांनी गोव्याच्या शिष्टमंडळाला केंद्रीय मंत्र्यांनी दिलेल्या आश्वासनावरून कर्नाटकला म्हाईदबाबत काहीच दिलासा नाही का, याबाबत पंतप्रधानांनी स्पष्टीकरण द्यावे, असा सवाल केला आहे.

कर्नाटक प्रदेश काँग्रेसचे अध्यक्ष असलेल्या डी. के. शिवकुमार यांनी म्हटले आहे की, म्हादई प्रश्नाबाबत केंद्रीय गृहमंत्र्यांनी गोव्याच्या मुख्यमंत्र्यांना सकारात्मक आश्वासन दिल्याचे कळते. मग या मुद्याबाबत कर्नाटकला काहीच आश्वासन नाही का? भाजप सरकार कर्नाटकचा हक्क उघडपणे डावलत आहे का? असे सवाल डी. के. शिवकुमार यांनी केले आहेत. कर्नाटक दौऱ्यावर असलेल्या पंतप्रधान नरेंद्र मोदी यांनी याबाबत बोलावे, असेही त्यांनी म्हटले आहे.

म्हादई प्रश्नी गोव्याचे मुख्यमंत्री डॉ. प्रमोद सावंत यांनी गोव्यातील इतर मंत्र्यांच्या शिष्टिमंडळासोबत केंद्रीय गृहमंत्री अमित शाह यांची बुधवारी भेट घेतली. म्हादईविषयी गोव्याची बाजू शिष्टमंडळाने सविस्तरपणे अमित शाह यांच्यासमोर मांडली. म्हादई प्रश्नात लक्ष घालू, असे आश्वासन अमित शाह यांनी दिल्याचे सांगण्यात आले होते.

कळसा आणि भांडुरा या म्हादईच्या उपनद्यांचे पाणी वळविण्यासाठी केंद्रीय जलआयोगाने कर्नाटकाच्या सुधारित सविस्तर प्रकल्प आराखड्याला (डीपीआर) दिलेली मंजुरी रद्द करावी, तसेच म्हादई पाणी प्राधिकरण स्थापन करावे अशा मागण्यांचे निवेदन यावेळी शिष्टमंडळाच्या वतीने अमित शाह यांना देण्यात आले होते.