Goa Accident: मुरगाव तालुक्यातील वरुणापुरी जंक्शन येथे झालेल्या भीषण अपघातात एका संरक्षण कर्मचाऱ्याचा जागीच मृत्यू झाला. अरविंद पासवान असे या कर्मचाऱ्याचे नाव आहे. पासवान हे त्यांच्या बाईकवरून (GA O6 R 8173) चालले होते.

त्यावेळी भरधाव वेगाने आलेल्या ट्रकने (KA 63 2716) त्याच्या बाईकला जोरदार धडक दिली. त्यात त्यांचा मृत्यू झाला.

या अपघातानंतर येथे तणाव वाढला होता. हेडलँड सडा येथून हा ट्रक आला होता. वास्कोचे आमदार कृष्णा साळकर यांनी घटनास्थळी भेट दिली.

दरम्यान, स्थानिकांनी येथे गतीरोधक बसविण्याची मागणी केली. गतीरोधक न केल्यास येथून वाहतूक करू देणार नाही, असा इशारा स्थानिकांनी दिला आहे. वाहनधारक येथून बेदरकारपणे वाहने हाकत असतात.

येथे लोकवस्ती आहे. लहान मुळे खेळत असतात. त्यामुळे अपघाताची शक्यता आहे, असे स्थानिकांचे म्हणणे आहे. मुरगाव पोर्टमुळे होणाऱ्या वाहतुकीमुळे वारंवार अपघात आहेत, त्यातून गोव्याला महसूल काही मिळत नाही, अशी तक्रार स्थानिकांनी केली आहे.