Bicholim News : डिचोली, कारापुरात टाळ-मृदंुगाचा गजर आणि विठ्ठल नामाच्या जयघोषात विठ्ठलभक्त वारकरी पंढरपूरला जाण्यासाठी मार्गस्थ झाले आहेत.

कारापूर येथील श्री शांतादुर्गा ज्ञानेश्वर वारकरी मंडळाच्या माघ पायीवारीला आजपासून (बुधवारी) उत्साही आणि भक्तिमय वातावरणात प्रारंभ झाला आहे.

या वारकरी मंडळाचे माघ एकादशी पायवारीचे यंदाचे दुसरे वर्ष असून, महिला आणि ज्येष्ठ वारकरी मिळून यंदा चाळीस विठ्ठलभक्त या पायीवारीत सहभागी झाले आहेत. यात ७० वर्षे वय पूर्ण केलेल्या वारकऱ्यांचाही समावेश आहे.

बुधवारी सकाळी विठ्ठलभक्त वारकऱ्यांनी कारापूरचे आराध्य दैवत श्री शांतादुर्गा देवीसह अन्य देवदेवतांचे आशीर्वाद घेतले.

नंतर वारकऱ्यांनी पंढरीला जाण्यासाठी वाट धरली. वारकरी मार्गस्थ झाले त्यावेळी विठ्ठल नामाचा एकच जयघोष सुरू झाला.

श्रीरामांचा जयघोषही कानावर पडत होता. मंदिर परिसरात मंगलमय आणि भक्तिमय वातावरण पसरले होते. वारकऱ्यांना निरोप आणि शुभेच्छा देण्यासाठी त्यांचे नातलग आणि शुभचिंतकही आले होते. कारापूर-सर्वणमार्गे दोडामार्गहून हे वारकरी पंढरपुरला जाणार आहेत.

तेरा दिवस पायी प्रवास

कारापूरहून पंढरपूरला मार्गस्थ झालेल्या वारकऱ्यांमध्ये ज्येष्ठ पुरुष आणि महिलांचा समावेश आहे. दुपारी आणि रात्री ठराविक ठिकाणी विश्रांती घेऊन सलग तेरा दिवस हे वारकरी पायी चालत प्रवास करणार आहेत.

१९ फेब्रुवारी रोजी हे वारकरी पंढरपूरला चंद्रभागेच्या तिरी पोचणार आहेत. २० रोजी माघ एकादशी यात्रेत हे वारकरी सहभागी होणार आहेत. पंढरीच्या श्री विठूमाऊलीचे दर्शन घेऊन हे वारकरी माघारी परतणार आहेत.

मला श्री विठूरायाच्या दर्शनाची आस लागली आहे. कधी एकदा पंढरपूर गाठून विठूरायाचे दर्शन मिळते याची ओढ लागली आहे, असे वयोवृद्ध वारकरी शाणी नार्वेकर यांनी सांगितले.