Kadamba Transport Corporation: गोवा सरकारने येत्या १ जुलैपासून राज्य आणि केंद्र सरकारचे विभाग, स्वायत्त संस्था, महामंडळे आणि अनुदानित संस्था यांच्या कर्मचाऱ्यांना प्रवास भत्ता मिळत असल्याने कदंब वाहतूक महामंडळाने बस पासची सवलत बंद करण्याची घोषणा केली आहे.

या कर्मचाऱ्यांना सध्या जारी केलेले विद्यमान पास त्यांच्या वैध कालावधीपर्यंत सुरू राहतील आणि त्यानंतर कोणतेही नूतनीकरण केले जाणार नाही, असे महामंडळाने जारी केलेल्या परिपत्रकात नमूद केले आहे.

कदंब बसेसच्या कमतरतेमुळे महामंडळाने आंतरराज्य मार्गांसह सुमारे ६० मार्गांवर सेवा देणे बंद केले आहे. १५ वर्षांहून अधिक जुन्या बसेस भंगारात काढण्याचा नियम असल्याने ५० ते ६० बसेस भंगारात काढल्या आहेत. स्कूल बसेससाठीही मागणी आहे. सरकारने अलीकडेच ५० डिझेल बसेस मंजूर केल्या आहेत. या आंतरराज्य मार्गांचा वापर करून मुंबई, पुणे, हुबळी हे मार्ग पुन्हा सुरू केले जातील, अशी माहिती अध्यक्ष उल्हास तुयेकर त्यांनी दिली.

हैदराबादच्या ऑलेक्ट्रा ग्रीनटेकने कदंब महामंडळाला १५० ईव्ही बसपैकी फक्त ५६ बसेसचा पुरवठा केला आहे. सर्व १५० बसेस मेपर्यंत पोहोचवल्या जाणार होत्या. यासंदर्भात कंपनीला कारणे दाखवा नोटीस बजावली आहे.