Kadamba Bus Service : ‘ डिचोली तालुक्यातील ग्रामीण भागातील प्रवासी बससेवा कोलमडली आहे. साळ ते मडगाव मार्गावरील कदंबच्या बसगाडीच्या अनियमितपणात वाढ झाली आहे. अधूनमधून ही बस चार-चार दिवस गायब होत असते, अशी प्रवाशांची तक्रार आहे.

ही प्रवासी बससेवा बेभरवंशाची बनली असून, अधूनमधून कदंबच्या बसेस वाटेतच बंद पडत आहेत.

काल गुरुवारी डिचोली-साखळी रस्त्यावरील वाठादेव परिसरात कदंबची एक प्रवासी बस रस्त्यावरच बंद पडली. त्यामुळे प्रवाशांची गैरसोय झाली. कदंब वाहतूक महामंडळाने प्रवासी बससेवा सुरळीत करावी, अशी प्रवाशांची मागणी आहे.

डिचोली-साखळीमार्गे साळ ते मडगाव मार्गावर वाहतूक करणाऱ्या कदंबची बससेवा प्रवाशांना सोयीस्कर असली, तरी या बसच्या अनियमितपणात वाढ झाली आहे. त्यामुळे साळसह ग्रामीण भागातील प्रवाशांची मोठी गैरसोय होत आहे.

बसच्या अनियमितपणामुळे नोकरीधंद्यानिमित्त शहराच्या ठिकाणी जाणाऱ्या प्रवाशांसह विद्यार्थीवर्गाचेही हाल होत आहेत.

साळ येथून सकाळी साडेसहा वाजता सुटणारी कदंबची ही प्रवासी बस लाडफे, डिचोलीहून कारापूरमार्गे साखळीहून मडगाव अशी वाहतूक करते.

सायंकाळी माघारी परतणारी ही बस रात्री साडेआठ वाजेपर्यंत साळ येथे पोचते. ही बस साळसह कासारपाल, लाडफे, सर्वण आणि कारापूर ग्रामीण भागातील विद्यार्थ्यांसह अन्य प्रवाशांना सोयीस्कर ठरत आहे.