पेडणे: पत्रादेवी ते मडगाव मार्गावर सकाळ व संध्याकाळ जलद वाहतूक करणारी कदंब बस कदंब महामंडळातील एक कर्मचारी रॉकलेस लुईस यांनी कदंबच्या मडगाव आगारात हस्तक्षेप करून मडगाव ते म्हापसा दरम्यान ही बस स्थानिक (लोकल) केल्याने अन्य बस गाड्यांचे वेळापत्रक चुकत असल्याने प्रवाशांची मोठ्या प्रमाणात गैरसोय होत आहे.

रात्रीच्यावेळी महिलांच्या सुरक्षिततेचा प्रश्न निर्माण झाला असून पणजी, म्हापसा, पेडणे व संबंधित इतर मार्गावरील प्रवाशांनी मुख्यमंत्री डॉ. प्रमोद सावंत तसेच कदंबचे संचालक, मानव आयोग यांना निवेदनवजा तक्रार करून या मार्गावरील कदंब बस पूर्ववत सुरू करण्यात यावी अशी मागणी केली आहे.

मडगाव पत्रादेवी मार्गावरील या बसमुळे विद्यार्थी व कामगार वर्ग यांना बराच फायदा होत होता, पण हल्लीच कदंब महामंडळाचे कर्मचारी रॉकलेस लुईस यांनी मडगाव आगाराच्या कामगारांना खडसावून ही बससेवा मडगाव ते म्हापसा दरम्यान स्थानिक सुरू केली आहे. यामुळे या बसमधून प्रवास करणाऱ्या प्रवाशांना घरी पोहोचायला अर्धा ते तासभर उशीर होतो .यामुळे सर्वांना बराच त्रास सहन करावा लागत आहे.

प्रवाशांनी रॉक लुईस यांना विनंती करून ही बस जलद सुरू ठेवावी, असा आग्रह केला. पण त्यांनी उलट प्रवाशांनाच उडवाउडवीची उत्तरे दिली, अशी माहिती प्रवाशांनी दिली.

रॉक लुईस हे मडगाव कदंब आगराचे आगर व्यवस्थापक पण सध्या मागचे दीड दोन वर्षे ते मडगाव आगर सोडून कदंबाच्या मुख्यालयात बसून विभागीय वाहतूक अधिकारी आहेत. रिक्त विभागीय वाहतूक अधिकारीपद सरकारकडून भरले जात नाही. त्यामुळे सर्व आगारांतील सहाय्यक आगर व्यवस्थापकांवर ताण येत आहे.