साखळी : साखळी पालिकेच्या उपनगराध्यक्षपदी झालेल्या चुरशीच्या लढतीत कॉग्रेस समर्थक ज्योती प्रवीण ब्लेगन यांनी 7 विरुध्द 6 मतांनी निवड झाली. ज्योती ब्लेगन यांनी भाजप समर्थक दयानंद बोर्येकर यांचा 7 विरुध्द 6 मतांनी पराभव केला. राजेश सावळ यांची नगराध्यक्षपदी निवड झाल्यामुळे त्यांनी उपनगराध्यक्षपदाचा राजीनामा दिल्याने हे पद रिक्त झाले होते.

साखळी पालिका कार्यालयात आज (शुक्रवारी) उपनगराध्यक्षपदाची निवडणूक घेण्यात आली. या पदासाठी कॉंग्रेस समर्थक ‘टुगेदर फॉर साखळी’ गटातर्फे ज्योती ब्लेगन यांनी अर्ज भरला तर भाजप समर्थक ‘साखळी विकास आघाडी’ गटातर्फे दयानंद बोर्येकर यांनी अर्ज भरला.

ब्लेगन यांना नगराध्यक्ष राजेश सावळ, धर्मेश सगलानी, कुंदा माडकर, राया पार्सेकर, राजेंद्र आमेशकर, अंसिरा रियाज खान या नगरसेवकांनी मतदान केले तर भाजप समर्थक बोर्येकर यांना आनंद काणेकर, यशवंत माडकर, ब्रह्मानंद देसाई, रश्मी देसाई, शुभदा सावईकर या नगरसेवकांनी मतदान केले. निवडणूक अधिकारी म्हणून दीपक वायंगणकर यांनी काम पाहिले.