पणजी: राज्यात क्षयरोगाचे (Tuberculosis) प्रमाण वाढत आहे. या वर्षी जानेवारी ते सप्टेंबर दरम्यान 1,532 क्षय रोगाची प्रकरणे नोंदवली गेली असून याच कालावधीत 24,336 चाचण्या करूनही केवळ 99 रुग्ण बरे झाल्याची धक्कादायक माहिती समोर आली होती.

राज्याचे आरोग्यमंत्री विश्वजीत राणे यांनी प्रसिद्ध मराठी अभिनेत्री आणि गोमंतकीय कन्या वर्षा उसगावकर आणि जॉन डी सिल्वा हे दोन्ही कलाकार गोव्याचे टीबी ब्रँड ॲम्बेसेडर म्हणून सामील झाल्याची माहिती दिली आहे.

आरोग्यमंत्री आणि वाळपईचे आमदार विश्वजीत राणे यांनी फेसबुकवर केलेल्या पोस्टनुसार वर्षा उसगावकर आणि जॉन डी सिल्वा राज्याचे नवीन टीबी ॲम्बेसेडर म्हणून सामील झाल्याने आता क्षय रोगाविरुद्ध सामना करायला मदत मिळणार आहे.

क्षय रोगाला हद्दपार करायचं असेल तर लोकांना एकत्रित करणं महत्वाचं आहे तसेच गोवेकरांमध्ये या रोजगाबद्दल जागरूकता निर्माण होणं गरजेचं असल्याचं आरोग्यमंत्री म्हणालेत.

प्रसिद्ध अभिनेत्री वर्षा उसगावकर तसेच विनोदी अभिनेते जॉन डिसिल्वा यांनी क्षयरोग जागृती मोहिमेच्‍या जाहिरातीत काम केले असून त्यांनी ‘क्षयरोगमुक्त गोवा’साठी पुढाकार घेतला आहे.

या नवीन उपक्रमामधून रोगाची लक्षणं ओळखण्यात तसेच रोगाने ग्रासलेल्या रुग्णांना मदत मिळेल आणि येणारा काळ हा गोव्यासाठी आरोग्यदायी भविष्य निर्माण करेल अशी अशा बाळगली जातेय.