पणजी: 'मला गोव्याच्या मुख्यमंत्रिपदाची कोणतीही ऑफर नव्हती, तसेच गोव्यातील कोणत्याही राजकीय पदाच्या स्पर्धेत मी नव्हतो आणि नाही. या सर्व अफवा आहेत', असा पुनरुच्चार केरळचे राज्यपाल राजेंद्र आर्लेकर यांनी केला.

आर्लेकर यांनी आज (०१ जानेवारी २०२५) गोव्याचे राज्यपाल पी. एस. श्रीधरन पिल्लई यांची भेट घेऊन केरळ राज्यात जबाबदारी सांभाळण्यापूर्वी विविध विषयांवर चर्चा केली.

समाज माध्यमांशी संवाद साधताना राज्यपाल आर्लेकर म्हणाले- राज्यपाल पिल्लई हे मूळचे केरळचे असल्याने मी त्यांच्यासोबत केरळसंदर्भात चर्चा केली. राज्यपाल या नात्याने त्यांचे गोव्यातील विविध घटनांकडे लक्ष आहे; मात्र त्यावर मी टिप्पणी करणे गरजेचे नाही. आम्ही गोव्यातील अन्य कोणत्याही गोष्टींची चर्चा केली नाही.

सरकारला मदत करणार

राज्यपाल पिल्लई हे माझे चांगले मित्र आहेत व ते स्वतःच केरळचे असल्याने त्यांच्याकडून मी केरळ राज्यातील विकासाबाबत माहिती घेतली. तेथील विविध गोष्टींबद्दल त्यांची मते जाणून घेतली. गोव्याप्रमाणे केरळात देखील पर्यटन क्षेत्र विकसित झाले आहे.

पिल्लई यांनी मला केरळमधील पर्यटन आणि अर्थव्यवस्था यांची माहिती दिली. गोव्याप्रमाणे केरळ देखील माझाच आहे. मी तिथे कुणाला शिकवायला किंवा आज्ञा द्यायला चाललो नाही. तेथील सरकारला त्यांच्या कामात मदत करण्यास मी चाललो आहे, असे त्यांनी स्पष्ट केले.