पणजी: गिरी येथे पकडलेल्या ११ कोटी ६७ लाख रुपयांच्या अमलीपदार्थ व्यवहाराची व्याप्ती देशाबाहेरही असल्याचे पोलिस तपासात उघड झाले आहे. या प्रकरणी आजवर तिघांना अटक करण्यात आल्याची माहिती गुन्हे शाखेचे पोलिस अधीक्षक राहुल गुप्ता यांनी दिली.

गिरी येथे राहणारा गौतम एम (२६, बंगळूर) याच्या सदनिकेची तपासणी केली असता पोलिसांना पारदर्शक प्लास्टिक पिशवीत सुकवलेले हिरवट फळधारक शेंडे (बड्स) आढळले, जे हायड्रोपोनिक वीड (गांजा) असल्याचा संशय आहे.

पोलिस निरीक्षक तुषार लोटलीकर यांनी छापा टाकला आणि त्यांनी गौतम याला मुद्देमालासह अटक केली. त्यानुसार ८ मार्च २०२५ रोजी सकाळी पोलिस निरीक्षक प्रशाल पी. एन. देसाई यांनी दिलेल्या तक्रारीवरून गुन्हा नोंदवण्यात आला.

चौकशीत असेही उघड झाले की, हा अमलीपदार्थ गोव्यात विकला जाणार होता. त्यामुळे हा गुन्हा उघडकीस आणण्यात गोवा पोलिसांना मोठे यश मिळाले आहे. टोळीतील इतर सदस्य सध्या थायलंडमध्ये लपल्याचा संशय असून त्यांच्याविरुद्ध लूक-आउट सर्क्युलर आणि ब्लू नोटीस जारी करण्यात आली आहे. या प्रकरणातील सर्व संशयित सध्या पोलिस कोठडीत अाहेत.