Ponda News :

फोंडा, येथील मध्यवर्ती सदर भागात रात्रीच्या वेळी अज्ञातांकडून कचरा टाकण्याचे प्रकार घडत असून हा परिसर ओंगळवाणा होण्यापासून रोखण्यासाठी पालिकेने सीसीटीव्ही कॅमेरा लावावा अशी मागणी होत आहे.

हर्षद देसाई यांनी याबाबत फोंडा पालिकेला एक निवेदन सादर केले आहे. सदर भागातील डीके आर्केड परिसरात वीज खात्याच्या ट्रान्सफॉर्मरजवळच मोकळ्या जागी हा कचरा अज्ञातांकडून फेकला जात आहे. विशेषतः हा प्रकार रात्रीच्या वेळी होत असल्याने कचराफेकू सापडत नाही, त्यामुळेच या ठिकाणी सीसीटीव्ही कॅमेरा लावण्याची मागणी होत आहे.

प्लास्टिक तसेच अन्य कचऱ्याबरोबरच घर दुरुस्तीवेळी वापरण्यात येणारे टाकाऊ साहित्य, टाकाऊ टाइल्स, कुजके पदार्थ तसेच इतर साहित्य बिनधास्तपणे या ठिकाणी फेकले जात असल्याने हा परिसर ओंगळवाणा ठरला आहे. या कचऱ्याला आग लागल्यास ट्रान्सफॉर्मरलाही धोका आहे, असे हर्षद देसाई यांनी पत्रकारांना सांगितले.