पणजी: सोशल मीडिया नियमांचे उल्लंघन केल्याच्या कारणावरून ‘मेटा’ कंपनीने ब्लॉक केलेल्या इन्स्टाग्राम खात्यावरील सर्व डेटा सुरक्षित ठेवण्यात येईल, असे स्पष्टीकरण कंपनीतर्फे मुंबई उच्च न्यायालयाच्या गोवा खंडपीठात देण्यात आले. दरम्यान, याचिकाकर्ते हर्षद नाईक यांनी अपीलीय प्राधिकरणाकडे दाखल केलेल्या अपिलावर तीन महिन्यांच्या आत निर्णय घेण्याचे निर्देश न्यायालयाने दिले.

स्थानिक इन्फ्लुएन्सर हर्षद नाईक यांनी एका जाहिरातीसंदर्भात केलेली पोस्ट ‘मेटा’च्या नियमांचे उल्लंघन करणारी असल्याचे नमूद करत कंपनीने त्यांचे इन्स्टाग्रामसह अन्य मध्यस्थ प्लॅटफॉर्मवरील खाते ब्लॉक केले होते.

या कारवाईविरोधात त्यांनी अपीलीय प्राधिकरणाकडे अपील दाखल केले होते. मात्र, त्यावर वेळेत निर्णय न झाल्याने त्यांनी गोवा खंडपीठात धाव घेतली. अपीलीय प्राधिकरणाला प्रलंबित अपिलावर तातडीने निर्णय देण्याचे निर्देश द्यावेत, तसेच ‘मेटा’ला त्यांचे इन्स्टाग्राम खाते पूर्ववत सुरू करण्याचे आदेश द्यावेत, अशी मागणी त्यांनी याचिकेत केली होती.

४५ हजार प्रकरणे प्रलंबित

सुनावणीनंतर भारताचे डेप्युटी सॉलिसिटर जनरल ॲड. प्रवीण फळदेसाई यांनी सांगितले की, केंद्र सरकारच्या आकडेवारीनुसार अपीलीय प्राधिकरणाकडे सध्या अशा स्वरूपाची सुमारे ४५ हजार प्रकरणे प्रलंबित आहेत. त्यापैकी आतापर्यंत केवळ ९ हजार प्रकरणांचा निपटारा करण्यात आला आहे.