Cuncolim IDC Inspection

पणजी: कुंकळ्ळी औद्योगिक वसाहतीतील कारखान्यात कामगारांसाठी असलेल्या अपुऱ्या सुविधांचा पंचनामा कामगार खात्याने सुरूच ठेवला आहे. गेल्या १५ दिवसांत २० कंपन्यांची यासाठी कामगार निरीक्षकांनी तपासणी केली आहे.

कामगार आयुक्त डॉ. लेविनसन मार्टिन्स यांनी काही तक्रारींची दखल घेत ही तपासणी मोहीम राबवणे सुरू केले आहे. यासाठी मडगावमधील दोन कामगार निरीक्षक आणि पणजीतून कामासाठी मडगावला दोन कामगार निरीक्षक पाठवण्यात आले आहेत.

या तपासणीनंतर अहवाल सादर झाल्यानंतर कामगारांची सुरक्षितता, किमान वेतन, कामाच्या ठिकाणची स्वच्छता, कामगारांसाठी असलेली स्वच्छतागृहे, कामगारांसाठी नियमानुसार असणारी विश्रांतीची सोय या मुद्यांच्या आधारे कारवाईचा निर्णय खाते घेणार आहे.

अनेक धक्कादायक गोष्टी उघड

कामगार निरीक्षकांनी केलेल्या पाहणीत अनेक धक्कादायक बाबी उघड झाल्या आहेत. कामगार उपायुक्त प्रसाद पेडणेकर हे या तपास मोहिमेचे संयोजन करत आहेत. त्यांच्याकडे आलेल्या माहितीनुसार, कामगारांची स्वच्छतागृहे अस्वच्छ असणे, विश्रांतीच्या जागेच्या बदल्यात भंगार ठेवण्याची खोली दाखवणे, कामगारांची अत्यंत गलिच्छ जागेत राहण्याची व्यवस्था करणे, कामगारांनी उघड्यावरच आंघोळ करणे आदी प्रकार या कामगार निरीक्षकांना आढळले आहेत.