Goa SGPDA: मुंबई उच्च न्यायालयाने दिलेल्या आदेशानुसार मडगाव नगरपालिकेचे मुख्य़ाधिकारी गौरीश शंखवाळकर, ‘एसजीपीडीए’चे सदस्य सचिव, नगरपालिकेचे अभियंते व अधिकाऱ्यांनी आज संध्याकाळी मडगावच्या घाऊक मासळी मार्केटची पाहणी केली.

या संदर्भात बोलताना मुख्याधिकारी शंखवाळकर यांनी सांगितले की, हे घाऊक मासळी मार्केट असून येथे किरकोळ मासळी विक्री करता येत नाही. त्या संदर्भात न्यायालयात प्रश्र्न उपस्थित करण्यात आले होते.

येथील किरकोळ मासळी विक्रेत्यांचा प्रश्र्न कसा सोडवावा या बद्दल पाहणी करुन व नंतर सर्व संबंधितांची बैठक घेऊन उपाययोजना तयार केली जाईल व ९ ऑक्टोबर रोजी न्यायालयाच्या पुढील सुनावणीच्या वेळी सादर केली जाईल,असे मुख्याधिकारी शंखवाळकर यानी सांगितले.

तसेच मार्केटमध्ये आरोग्यदायी वातावरण निर्माण करण्याची जबाबदारीही आमच्यावर आहे. रस्त्यावर वाहने पार्क केली जातात, त्याबद्दलही उपाययोजना केली जाईल. या घाऊक मासळी मार्केटमधील फळ व भाजी विक्रेत्यांना हटविले आहे. त्यांच्यावर कारवाईची जबाबदारी नगरपालिका निरीक्षकांवर टाकण्यात आल्याचे मुख्याधिकाऱ्यांनी सांगितले.

‘एसजीपीडीए’च्या सदस्य सचिवाने सांगितले की, आमच्या वतीने दोन्ही मार्केटमध्ये स्वच्छता राखण्याचे सर्वतोपरी प्रयत्न चालू आहेत. मडगाव घाऊक मासळी विक्रेते संघटनेचे प्रतिनिधीही या वेळी उपस्थित होते.